I
موغاندا دۆشدو قوراقلیق، چاییر، چمن یاندی،
گۆنش قؽزاردی سحردن، اۆفوق آلوولاندی.
قویون-قوزو قؽریلیب، مال-قارا هلاک اولدو،
و شاهسئون ائلینین نوباهاری تئز سولدو.
بیر آی ایچینده بیر ایللیک امکلر اولدو هدر،
داغیلدیلار آلاچیقدا عؤمور سۆرن ائللر.
چوبانلار اؤلدو، چوبان ایتلری تباه اولدو،
دئین، گۆلن ائلین ائی واه، گۆنو سیاه اولدو.
گئجه چادیردا یانان لامپالار کئچیب گئتدی،
بو بیر حکایت ایدی، دۆنیادا اولوب بیتدی.
II
ایشیقلارا بویانارکن او مؤحتشم شهرین،
یاناشدی داروازایا آج، سوسوز قالان کاروان.
او شهردهکی دومان توزونا چکر اؤرتوک
قوناقلارا دئمهدی بیر نفر ده: — خوش گؤردوک.
سریلدیلر قورو یئرده، اوتوردولار ناچار
سارایدا توی توتولاندا، یاناندا شامعدانلار.
چؽراق، چؤرک قوناغا کیمسه وئرمهدی یالنیز،
گئجهیله ایتدی اۆچ اوغلان، کیچیک، گؤزل بیر قؽز.
بۆتون بازار، کۆچهنی گزدی اۆچ کیشی بیجا،
اوشاقلارین سوراغین کیمسه وئرمهدی اصلا.
گۆناورتا گلدی پولیس، آج قالانلاری قوودو،
دئمک کی، زنگین اولاندان قادا-بالا سوودو.
یئر آختاریردی کؤچنلر شهردن آزجا کنار،
تاپیلدی بیر خارابا، اوردا بیر گئنیش آنبار.
کیلیم دؤشندی، اوشاقلار بیر-بیر یاتدی،
اوزاندی کؤلگه، بیر آز سونرا دا گۆنش باتدی.
قارانلیق اولدو، قبیله دۆشونجهیه دالدی،
بیر آروادین شۆشه بیر لامپاسی ایشیق سالدی.
بیری ساماوارینی قاینادیب، اوجالدی سسی،
ساماوارین اودو سؤندو، کسیلدی زۆمزومهسی.
چؤرک تاپیلمادی بیر سۆفرهده، داغارجیقدا،
سارالتدی بیر گئجهده ائل-اوبانی آجلیق دا.
اوشاقلار اؤلدو آجیندان، داغیلدی شهره اوبا،
موغان گلینلری ائی واه، دیلندی، اؤلدو گدا.
III
موغان ماحالینا گئتدیم، قاریش-قاریش گزدیم،
سنین سوراغینی توتدوم، پاییز و قؽش گزدیم.
وطنده آه نه گؤزللیک، نه بیر صفا گؤردوم،
سؤنوک اوجاق، قورو کهریز، یؽخیق کوما گؤردوم.
چیچکلی، گۆللو چمنلر منی قوجاقلارکن
سنین دالینجا گؤزل باخ، بو شهره گلدیم من.
بو ظۆلمته قوووشوب اؤز مورادیما چاتدیم،
خرابا ایچره دئمک، گنج آختاریب تاپدیم.
گۆنشله شؤعله چکن داشلی چؤللری کئچدیم،
و اؤلمهدن اؤلومون سرت شرابینی ایچدیم.
نهدنسه گؤرمهدیم، اصلا، گزنده من شهری
خیالیمین اۆفوقونده گۆلن یاشیل حدیقهلری.
او سؤزده، سازدا گۆلن گۆللنن شهر بو ایمیش؟
گؤزللیگیله جاهاندا اولان شؤهره بو ایمیش؟
سعادتین قوشو بوردان کئچیب قاناد چالماز،
محبّتین آغاجی تورپاغیندا کؤک سالماز.
بو یئرده ظۆلمت اودوبدور بۆتون ایشیقلاری آه،
یئنی نسیل چۆرویوبدور، فنا اولوب، گۆمراه.
شیمالدا باغچالاری خسریوانه یوردو، بوراخ،
جنوبدا «زاغا»لارا، پالچیق ائولره بیر باخ.
شیمالدا دوم-دورو سو، یام-یاشیل چینار واردیر،
جنوبدا اودلو گۆنش، قاپ-قارا سولار واردیر.
بودور، آغیر آرابا حمل ائدن آریخ ریکشا،
عجملر ایچره یئنی مئیدانا چؽخان گئیشا،
او سۆسلو بیر آرابا زنگینی باغا آپاریر،
یالین آیاق گئدنین ده آیاقلاری قاباریر.
بو یاندا ایت اؤلوسو، پیس قوخان سولار، کۆللوک،
او یاندا توزلارا باتمیش یاشیل چمن، گۆللوک.
ایپک گئییملی، بزکلی خانیملارا باخما،
ایشیقلی رستورانا، دانسیغا، بارا باخما.
یول اۆسته لۆت اوشاغی، آج قادینلاری سئیر ائت،
خرابهلرده یانانلار سوراغینا بیر گئت.
قاناد گریبدی بو یئرده قؽزیل سئون شئیطان
الینده اود و دمیر، هر گئجه دئییر قان-قان.
آغیز آچیر قارا زیندان، اودور ایلان کیمی آه،
ایشیقلی عالی جاهانا گئدنلری گاه-گاه.
قؽزیل کالسچایا گل باخ، یادا وطن ساتانی
هاوایی نفس یولوندا گۆناهلارا باتانی.
IV
بودور، بیزیم ائلیمیز کؤشهسین، ائوین بوراخیر،
آخین-آخین بو بلالی.جهنم ایچره آخیر.
دئمک کی، ساخسییا ساتمیش جواهیری ائلیمیز؟
بو توزلو بولود اۆچون تارمار اولوب تبریز.
چیچکلی، گۆللو چمنلر منی قوجاقلارکن،
سنین سوراغینی آلدیم، بو شهره گلدیم من.
سنی خارابادا تاپدیم، فلاکت ایچره آمان،
سنی اریتدی گؤزل قؽز، آلوو ساچان تهران.
گل ایندی غربه ساری، داغلاری آشیب گئدهلیم،
او یئردهکی یاشاییر ایندی اویماغیم و ائلیم.
«قارانقو»نون کناریندا، چادیر قوروب اوتوراق،
بیزه عزیزدی او کؤشن، او قارلی داغ، تورپاق.
گئجه آخار سولارین اینجه نغمهسین ائشیدک،
و توزلو یولدا گئدن کاروانین سسین ائشیدک.