اویان، ائی سئوگیلیم!

داغدان آی چؽخار، آغ پنجه آچار،
یارالی کؤنلوم دردلره دولار،
اۆزونه باخدیقجا قوشوم قونار
اویان، اویان، ائی سئوگیلیم، اویان!

ائشیدیلن سس کاروان سسیدیر،
اودلانان شامعین سون نفسیدیر.
آشیق غریبین هیجران بسیدیر
اویان، اویان، ائی سئوگیلیم، اویان!

مشریقدن چؽخیر اۆلکر اولدوزو،
جاندا آتش وار، اۆرکده سوزی،
«قارا چمن»ین ساریشین قؽزی
اویان، اویان، ائی سئوگیلیم، اویان!

یئل اسیب، قورو خزل تؤکولور،
اۆلکر باتیر، دان یئری سؤکولور.
چوخ یورغونام، دیزلریم بۆکولور...
اویان، اویان، ائی سئوگیلیم، اویان!

یارالی‌یام آه، اۆز-گؤزومدور قان،
اؤلوم گؤز اؤنونده، وئریردیم جان،
بیر ایچیم سو وئر، یانیرام آمان،
اویان، اویان، ائی سئوگیلیم، اویان!

قوی سو ایچیب ده اؤپوم آلنیندان،
تؤکولسون بیر آز ساچلارینا قان،
منی بکله‌ییر قارا کاریوان...
اویان، اویان، ائی سئوگیلیم، اویان!

دۆنیانین اهلی قان یاش سیلمزدیر،
اجلین پئیکی آمان بیلمزدیر،
گئجه یولچوسو گئدر-گلمزدیر...
اویان، اویان، ائی سئوگیلیم، اویان!