پاریلداییر اینجی تک سحر چاغیندا،
فجرین گؤز یاشلاری یارپاقلار اۆسته.
بولودلار آشیر اوجا داغلاری،
سۆرونور کؤلگهلر اوتلاقلار اۆسته.
چارداقلارا قونان گۆنون ایشیغی،
اؤپور دمیرلینین دوداقلاریندان.
یارپاغین سسی تک سئودالی آهنگ،
ائشیدیلیر کندین بولاقلاریندان.
نیشانلی قؽزلارین باخیشلاریندا
اۆمید آلوولاری اولور نۆمایان.
هر یئرده آچیلیب قؽزیل چیچکلر
آزادلیغین گۆنو دوغان زاماندان.
یاشیل تارلالاردا بیتن سۆنبوللر
کهربایی خیرمن حاظیرلامازمی؟
بونجا ساری گۆل تک آچان گلینلر
یئنی بیر دۆنیایی قورماغا آزمی؟