مۆرشید

یاغیشلا سولانمیش گۆل باغچاسیندا،
شبنم پاریلدارکن لاله تاسیندا،
باشیندا اوتوردون آخار سولارین
سئیر ائتدین حۆسنونو او سون باهارین.
ایصفاهان خالچاسی آلتینا سالدین،
قلیانینی چکیب خۆلیایا دالدین.

— حئیف اولسون، دئدین سولان گۆللره،
بو سو کیمی آخیب کئچن عؤموره.

گئجه‌لر یالدیزلی ائوینده یاتدین،
بیر گؤزل قادینا ایمانی ساتدین.
گۆنش یاییلاندا آچدین گؤزونو،
آینالاردا گؤردون چیرکین اۆزونو.
آه چکیب سؤیله‌دین: — عؤمروم چۆرودو،
گۆنش باتدی، داغی دومان بۆرودو.

بعضاً مجلیس قوروب آل شراب ایچدین،
سئودالارین یئددی شهریندن کئچدین.
سؤزده عیسی کیمی دۆنیانی آتدین،
تورپاغینی خالقین قؽزیلا ساتدین.
دئدین: آرزولارین قصری خرابدیر،
دیریلیک افسانه، دۆنیا سرابدیر.

فؽرتینا قوپاندا ائوینده قالدین،
قیامت گۆنونو یادینا سالدین.
دئدین: — نه مۆصیبت، نه توفان، یاهو!
«آج پولسوزلار»ینمی گۆناهیدیر بو.
ناحق قان تؤکولدو، آدام قؽریلدی،
اؤلولر باشیندان قالاق قورولدو.
سن «منطق الطیری» اوخودون بیر ده
گؤیده گزدین، خلقی گؤرمه‌دین یئرده.
یادلارا اؤزونو ساتدین، منی ده.
چۆروتدون عؤمرومو، سالدین مین درده.

کؤشنی قویمادین بزه‌ییم من ده،
گؤز دیکدین ده بیزیم خارابا کنده.
اۆفوقومده گۆلن گۆنو سؤندوردون،
منی بوغدو آمان، توزلو قارا گۆن.
قورومادین منی، آجلیق ایلینده،
قویمادین دانیشام آنا دیلینده.
دۆنیا دییشیلدی، ائللر اویاندی،
ظۆلمتلر ایچینده ایشیقلار یاندی.
سن قارا بولود تک گۆنشی بوغدون،
هر گۆن ایبلیس کیمی بلالار دوغدون.
یاد آراباسینا باغلاندین اؤزون،
— سۆرونورم دئدین، گل سن ده سۆرون.