آغ-گۆموش مینالی قندیللرین آل شؤعلهلری،
قانلی ایزلر بوراخیبلار سولارین چنگینده.
ماوی، فیروزه سارای آینالارا شفق سالیب
گؤرونور آینادا بیر پرده، سما رنگینده.
«روما»دان قالما او حشمتلی و یؽلدیزلی سارای
قؽرخ سۆتون اۆسته دوران دالغالی بیر دریادیر.
آغ ایپک پردهلر ایله بزنن قصر «یزید»
سانکی شهرین گئجهسینده آچیلان رؤیادیر.
آتش ایچره یانان عود مجلیسه بیر نشئه وئریب،
اویناییرلار بزنکلی کؤلهلر، جاریهلر.
اللی بئش باشقا کنیزلر یاری چؽلپاق، بیتکین،
مجلیسین اهلین افسونلایاراق سرخوش ائدر.
بۆرویوب عود و رۆباب سسلری، هر کس گۆلوشور،
ایچیلیر باده گۆلگون، قؽریلیر جام بیللور.
بو گئجه «شام» بزهنیلمیش و سارای توی توتموش
«کربلا» فتحی اۆچوندور قورولان بزم سۆرور.
فیل دیشیله بزنن بیر اوجا تخت اۆسته یزید
اوتوروبدور، دئیهسن قلعه آچان فیرعوندور.
قان ایچن، ائو یؽخان اول ظالیمه قاصید گتیریب
قانلی بیر حادثیهدن، فاجیعهدن، یاخشی نوید.
ایندی قؽرخ گۆن قورو چؤللرده گزن بیر کاروان
یاناشیر آی ایشیغیندا تپهنین زیروهسینه.
دوه اۆستونده سوسوز، آج قالان آرواد و اوشاق،
قولاق آسماقدادیلار قصرده بایرام سسینه.
دوهلر یورغون، اوشاقلار داها بیتگین، ائیواه،
هامی بیر سسله سوسوزلوقدان ائدیر آه و فغان.
شهرین تونج قاپیسی قورخولو سسله آچیلیر،
سۆنگولو بیر نئچه عسگر گؤرونور یوللاردان.
گئجه کئچمیش یاریدان، کوللار، ایچینده بیر قوش،
اوخویور کؤلگهلره گیزلیجه بیر شعر فراق.
قارا یارپاقلاری یئل ترپدیر، آی داغدا سؤنور،
آغلاشیرلار یئنیجه شاما گلن اهلی ایراق.
ماوی، فیروزه سارایدا ایچیلیر قؽرمیزی مئی،
قورو تورپاقدا یاتانلار گئجه خونانه ایچیر.
اوردا مینلرجه چؽراق، مینالی قندیل وارکن،
بوردا بیر قوپقورو آی وار، او دا ظۆلمتده کئچیر.
قرینهلر کئچدی، دییشدی جاهانین اؤزگی،
اما جلّادلارین احوالی دییشمز قالدی.
بیر چوخ آتش سویویوب، سؤنمهدی ظۆلمون آلووو،
سؤنمهدی، یاندی و عالملره آتش سالدی.