سنی «خوجا» غزللرین اودلادی،
یوخسا تۆرکون گؤزللری اودلادی؟
ایشیلدارکن قؽریق بیر آی داغلاردان،
دویولارکن بۆلبول سسی باغلاردان،
افسانهلر دیاریندان کئچدین سن،
گبرین قؽزیل شرابیندان ایچدین سن.
سنه گۆلدو ماوی سما، گؤی چمن،
یارین عکسین پیالهده گؤررکن.
قلم آلیب غزل یازدین، یاتمادین،
غزللرین قؽزیل پولا ساتمادین.
خراباتا گئدیب، قاچدین سارایدان،
سارایلاردا بیلدین اود وار، زنجیر، قان...
بیر «لولی»نین ساچلارینا گۆل تاخدین،
بزنکلی خاتونلاری بوراخدین.
شاعیرلرله حافیظ، سنین ایشین یوخ،
بیلیرم کی، دردین چوخدور، غمین چوخ.
سنی عشقین یانار اودو قووورموش،
خزان سنین گۆللرینی سووورموش.
قارانلیقدا توفانلارا توتولدون،
باشین دؤنوب، اولدو سنین کؤنلون خون.
ساحیللرده باخدین ایشیق ائولره،
گؤز گزدیردین هر بوجاغا، هر یئره.
یاردیمینا اصلا بیر کس گلمهدی،
بوغولانلار حالین کیمسه بیلمهدی.
کاروان کئچدی، یول اۆستونده اینلهدین،
جیرهلرین صداسینی دینلهدین...
قاپیسیندا معریفتسیز اربابین
«مدّاح»لار تک چؤل پالازین سالمادین.
گئجه اؤتوب، گۆندوز گزدین دربهدر،
بازارلاردا ایپک گؤردون سیم و زر.
چاغیرمادین یاردیمینا کیمسهنی،
شراب اۆچون گیروو قویدون خیرقهنی.
سرخوش اولوب توزلو یولدان کئچرکن،
باغچالاردا گؤردون آچیب نسترن.
شیرازلی بیر تۆرک گؤزلین گؤرنده،
ایپک دونون، مخملیلن گؤرنده
وورولدون سن بزگینه، آلینا،
ایکی شهری باغیشلادین خالینا.
معریفتسیز گؤروب شیراز اهلینی.
ترک ائلهدین یورد-یووانی، ائلینی.
یوللار کئچیب خارابادا یاتدین سن،
اینجیلرین باشقاسینا ساتدین سن.
زهرلهدی سنی عۆرفان شرابی،
اۆفوقلرده گؤردون توتن سرابی،
دئدین آچان هر مۆشکولو شرابدیر،
عؤمور قؽسا، آرزو ائوی خارابدیر.
عالیملری دئدین یولون آزیبلار،
«سرنوشتی» آلینلارا یازیبلار.
دۆنیا دئدین داوامسیزدیر، بینیادی،
بیر قاریدیر مین کیشینین آروادی.
بزهدینسه حافیظ، زنگین شعرینی،
آنلامادی کیمسه سنین شعرینی.
دۆنیا دؤنر، کئچر قؽشلار، گلر یاز
حافیظ سنی، «موللاباز»لار آنلاماز.
حافیظ، سنین شعرین درین دریادیر،
شعر دئییل، بیر خیالدیر، رؤیادیر.
فارس دیلینی اینجیلرله بزهدین،
چیرکین قؽزی دئمک زرله بزهدین.
آجلیق چکیب، حیاتیندا سارالدین،
سۆرونهرک گۆندوز، گۆنده قارالدین.
لذّت دویماز کور اولانلار گؤزلدن،
اؤلولره تاپار عجم ازلدن.
مزارلیقدیر بو یئر، ایتلر هۆررلر،
صنعتکاری سۆرگونلره سۆرورلر...
بو تورپاقدا بیر چوخ هرزه اوت بیتر،
هرزه اوتلار ایچره قؽزیل گۆل ایتر.
شاعیرلری زیندانلارا آتارلار،
سولارینا آجی زهر قاتارلار.
اونلار اۆچون سونرا تۆربه تیکرلر،
بسلهیرلر اوندا گؤی اوت، گۆل-چیچک.
اؤلنلرین یئری یاشیل جنّتمیش،
دیریلرین یئری اوزاق غۆربتمیش.
یووا سالمیش بوردا دیولر، شئیطانلار،
دیوان توتار خالقا یولدان آزانلار.
دیوانینی اوخویارکن هر آخشام
حافیظ، سنین احوالینا آجیرام.
عؤمور بویو آیدین بیر گۆن گؤرمهدین،
مورادینلا بیر گۆن حیات سۆرمهدین.
حیاتیندا، خارابادا یاتدینسا
ایندی یئرین بیر گۆلشندیر، خۆلاصا.
باشین اۆسته گئجهلری شام یانار،
پروانهلر قانادلاری اودلانار.
سنین اۆچون بۆلبول اؤتر گئجهلر،
اسمر قؽزلار باغ-باغچاندا دینجهلر.
دیوانینی آچیب سنی آنارلار،
عاشیق اولوب آتشینله یانارلار.