بوراسی بیر یاشیل، صفالی جنّت،
حاصارلاری اودلو و گورولتولو...
کؤلگهده اوتوروب بیر زنگین آدام
اصیل جنّت اهلی، تانرینین قولو.
بوراسی بیر باغدیر، هم ده گؤزل باغ،
گؤیو آچیق ماوی، هاواسی توزسوز.
گۆن پردهدن کئچیب یاییلیر یئره،
تورپاق اۆسته یاتیب آوارا بیر قؽز.
او توخوجو قؽزدیر کیرماندان گلمه،
باباسی اؤلوبدور، ایتیب آناسی.
او بیر فاحیشهدیر، زاواللی اینسان،
دامدان اونون آرتیق، دۆشوبدور تاسی.
بوراسی تهرانین لاپ گؤبگینده
قورولان واحهدیر و گۆلن رؤیا.
آخین-آخین گلیر ایشسیز آداملار
ایشسیز آداملار آه، گلمزلر سایا.
بیر «سؽغیناجاق»دیر بو شفقلی باغ
سۆرگون ائدیلنه، یوردسوز اولانا.
بو جنّتده یاشار جهنم اهلی
کؤثریندن ایچرلر قانا-قانا.
بیر یئرده درس اوخور، یوخسول طلبه،
اونو مشغول ائدن علم، هوسدیر.
بودور، اوزاقلاردان قوپور بیر صدا،
«بختیارلیق ساتان» اوشاق سسیدیر...
باخ یولدا دیلنن «آب حووضو» دور،
گۆنشدن یانمیش بیر قوجا کندلی...
کؤوشندن قووولموش بینوا آدام
اونو باشا سالمیر تهرانین دیلی،
بوراسی بیر یاشیل جنّت اولسا دا،
ایلهام وئرمز هئچ شاعیر اولانا.
بو باغین تورپاغی، گۆلو، چیچگی،
گؤز یاشیله ایسلاق بویانمیش قانا.
بوراسی بیر باغدیر، اؤرتموش آغاجلار،
اونداکی پیسلیگی یادلار گؤزوندن.
بوراسی باغ دئییل، قارا لکهدیر،
سیلینمزدیر اصلا تهران اۆزوندن.