ماکسیم قورکی‌یه

او مفتون اولدوغون انگین دنیزه،
سولار ایچره دوغان قؽزیل گۆنشه،
گئجه یاری‌سیندا صدف یول آچان،
او آی ایشیغینا، گۆموش آتشه
من ده سنین کیمی، حئیرانام، حئیران.

یاغیشلی سحرده آغ مارتیلارین،
بوز سولار اۆزره او تیرانلارین
منی ده غملدر، من ده گؤرموشم.
سولار قاباراندا «آغ» آتانلاری،
من ده بالیقچی‌نین آغین هؤرموشم.

گئجه یاری‌سیندا آغیر قاییقدا،
دالغالارا چارپان کۆرک چکنلر.
یئلین نفسیله سؤنن فانوسلار
سودا بوغولانلار، قؽریق یئلکنلر
درین دۆشونجه‌یه منی ده سالار.

یاخیجی گۆنشده قان-تر ایچینده،
قولدور خانلار اۆچون بیچین بیچنلر.
قورو چؤرک یئییب شۆکور ائدنلر،
سینیق کۆزه‌لرده شور سو ایچنلر،
اۆرگیمی اودلار، منی ده غملدر.

باهاردا گۆللنن چاییر، چمنلر
سحر نسیمیله اسن یارپاقلار.
قوش سسیله دولو قؽزیل زمیلر،
ککلیک‌اوتو قوخان سرین یایلاقلار
منه سحرین آیدین یولون گؤسترر.

«مدیترانه‌»نین ماوی اؤرپگی
پارلاق گۆندوزلری، آیدین گئجه‌سی،
و آی ایشیغیندا گؤیه یۆکسلن
روم قؽزلاری‌نین او فۆسونکار سسی
شعریمده ایزلری آچیلار همن.