بیر تاجیر غولامی کی، ازلدن طالعسیزمیش،
سارایدا خواجه اۆچون دگرسیز چالیشاردی.
او گؤزل بیر گنج ایدی، اما کی، غولام ایدی
گؤرنده ائو قؽزینی اودلانیب آلیشاردی...
بیر گئجه سارای ایچره هر یئرده قندیل یاندی
قلمکار سۆفرهلری دؤشهدی غولام یئره.
قوناقلار گلدی بیر-بیر، ایچیلدی قؽزیل شراب،
هر یئردن دانیشدیلار، قالمادی تپه، دره.
بو آرا سرخوش خواجه غولامی سسلهیهرک،
سرین سو خواهیش ائتدی ناخیشلی کاساسیندا.
او کاسا چیندن گلمه، مرجان تک بنزر ایمیش
آغ اؤرتو اۆزرینده هیندین آل آداسینا.
دئییرلر بیر قوناغین او قابا گؤزو دگدی
ائیواندا دۆشدو یئره، داش اۆسته پارچالاندی.
تشویشه دۆشدو غولام، تیترهییب قاچدی رنگی
بو قضا اۆزریندن اود توتوب خواجه یاندی.
سارایا گلدی دارغا، غولامی زنجیرلهدی
آپاریب بیر داخمادا آج-سوسوز بوراخدی دا.
دان یئری آچیلاندا غولامی سویا سالیب
سونرا دا شاللاقلاییب، دئدی: — ائی حارامزادا.
خواجهنین کاساسینی نه اۆچون سؽندیرمیسان؟
— وورما، قوی دۆزون دئییم، دئدی ائی دارغاباشی.
خواجهنین گؤزل قؽزی باخیردی پنجرهدن
آیاغیم سۆروشدو ده گؤرمهدیم یونما داشی.
زیندانا سالیندی او بیر نئچه آیدان سونرا
قاضینین امری ایله اؤلومه محکوم اولدو.
— او، قؽزا عاشیق ایمیش، بو گیزلی درد اۆزوندن
قارانلیق یئرده گۆل تک سارالیب، هم ده سولدو.
«بلخ»دن گلمه قاضی بیر «عادیل» آدام ایمیش،
بوغارمیش عدل آدی ایله ائللری پاییز و قؽش.
سوروشدو گۆناهسیزدان: — دئ گؤروم، یازیق اوغلوم،
اولدوزون سؤنوک ایمیش، توش اولدو سنه اؤلوم.
نه ایله بو گۆن اؤلمک ایستهییرسن؟ دئدی غولام:
— ائو قؽزی منه وئرسین زهرله دولو بیر جام.
ائشیکده ائشیدیلدی صبح چاغی قادین سسی،
گؤروندو ائوین قؽزی الینده مئی پیالهسی.
قؽز، قلم قاشلی دیلبر، دایانیب دؤزدو بیر آز.
گؤزلری یاشلا دولو، غولامی سۆزدو بیر آز.
قدحه تیترک الله زهرلی شراب تؤکدو
دؤشهییب اتکلرین یئر اۆسته دیزه چؤکدو.
سوندو شراب، غولام ایچرک رنگی سولدو.
سارالیب بت-بنیزی، قانینا زهر دولدو.
چاتلادی دوداقلاری، بوغونوق چؽخدی سسی،
سئوگیلی یارا دئدی: — ائی اؤلوم فریشتهسی
من ازل گۆندن اینان سئومیشم جاندان سنی،
یئنه ده شراب سولا، مست قؽل، گؤزل منی.
عاشیقین اؤلومونو گؤردو قؽز، اولدو غمگین،
زهرلی صۆراحییه اوزاتدی او دا الین.
بو آرا پنجرهدن ساری گۆل ایشیق سالدی
خزانلی داخما ایچره، قؽز قالدی، غولام قالدی.