یولدان کنار

یولدان کنار، دۆزنلیکده،
بیر آز اوزاق چای بویونجا
آلاچیقلار قورولوبدور،
بعضی آلچاق، بعضی اوجا.

هر یئر گؤی اوت، هر یئر چیچک،
تۆرکمن صحرا بوراسیدیر.
بو یئر زنگین اولسا بئله،
فلاکتین یوواسیدیر.

ایگید تۆرکمن اوشاقلاری،
اوتلادارلار آت، قارا مال،
ائوده قالان قؽز، گلینلر
خالچا توخور، گۆللو، خال-خال.

یؽرتیق چادیر آلتینداکی
قاری آرواد چؤرک یایار.
عؤمرونده‌کی گؤردوکلری
سولطانلاری آنار، سایار...

اوجا داغلار اتگیندن
جوشار، آخار، دورو چایلار.
تۆرکمنلرین امگیله،
پامبیق بیتر، چیچک آچار.

نه قؽش آنلار، نه یای آنلار،
ایستی گۆنده تاخیل بیچر.
چؽپلاق گزر، آیاق یالین،
کورلوق گؤروب، آجلیق چکر.

هر یئر گؤی اوت، هر یئر چیچک،
تۆرکمن صحرا بوراسیدیر.
الی خمیرلی، قارنی آج،
اینسانلارین اوباسیدیر...