یورد ماهنی‌سی

بیر یئرده ساواش قوپسا دا،
بیر یئرده باریشدی.
باخ آستارادا گۆللو باهار،
خویدا دا قؽشدی.
الواندی ساری داغلاریمیز
سانکی ناخیشدی.

باشدان-باشا آذربایجان
باغی — جناندی.
ماوی خزرین پرده‌سی
مین رنگه چالاندی.
ائل اوردوسودور، قالاسی
قارلی ساوالاندی.

یوردومدا آخار چایلار،
اۆزوم باغلاری واردیر.
قؽشلاقلاری وار،
عطیرلی یایلاقلاری واردیر.
اولدوزلو گئجه،
گۆللو سحر چاغلاری واردیر.

بوزقیرلارین آردیندان
ائلیم بیر گئجه کؤچموش
بو یوردا قونوب،
ائن-بویونو یاخشیجا اؤلچموش.
کهریز چؽخاریبدی او
سرین شربتین ایچمیش.

ائللردی ائدن اورمیه‌نی،
تبریزی گۆلشن.
گئتسن بیلیرم اردبیله
بیر سحر ائرکن
هر پرده ائلین
نقش و نیگارین گؤره‌جکسن.

آلدانما شیرین سؤز دئسه خان،
یوخدو وفاسی.
خان بیر ازلی دۆشمنیمیزدیر،
بیزه عاصی
دامدان دۆشوب آرتیق
او حریفین یئره تاسی!

دور یورد کئشیگینده، ایگیدیم!
باخ، اویانیق اول!
خان سۆدلو اینک ایسته‌ییر،
اربابی دا پترول،
وئرمه، بو حریف کئفلیدی ها!
اؤز ائوینه یول!

من سؤیله‌میرم حسرته قاتلان،
سیتمه دؤز!
بیر چوخ آنالار یوللارا
ایللردی دیکیب گؤز.
خان وئرسه ده آزادلیق
اینانما! نه یالان سؤز!

گل، کؤچمه وطندن،
یادا بئل باغلاما، قارداش!
دؤران بئله گئتمز، قالاماز
داش اۆزره داش!
شیمشک کیمی چاخ!
سئل کیمی آخ!
چالخالانیب داش!