سهنده ساری

سحر یولدان کئچرکن،
سلام وئردیک بره‌یه.
گۆن باتارکن او آخشام،
چاتدیق قوملو دره‌یه.

اوزاقلاردان باخانا
کؤلگه‌لر تک گؤروندوک.
«قارانقو»یا چاتارکن
سرینلیگه بۆروندوک.

ایکینجی گۆن داغ آردی،
سؤنور ایکن یورغون گۆن،
اوبالارا یاناشدیق،
گؤردوک واردیر توی، دۆگون.

گۆللر عطیر ساچیرکن،
سئل سولاری دورولدو.
کیلیم، خالچا دؤشنیب،
اود، اوجاقلار قورولدو.

گۆللنرکن باغچالار،
بالا دولور پتکلر.
قؽز-گلینلر اوینارکن
دالغالانار اتکلر.

خوش-بئش ائتدیک ائللرله
ایچدیک سرین آیرانلار.
ائشیتدیک کی، تالاییر
اوبالاری سولطانلار...