یورد ماهنی‌سی

دیلرم بیر پاییز گۆنو،
سحر دوغسون قؽزیل گۆنون،
آل بایراغین قاناد آچسین،
ائل-اوبالار توتسون دۆگون.

دیلرم، ای گؤزل یوردوم،
مورادینا خالقین یئتسین،
توز قونوبدور ساچلارینا،
سیلکین، سیلکین توزون گئتسین.

چایلارین وار دریا-دریا...
نه‌دن سوسوز قالسین ائللر؟
سن نسیمین قایناغی‌یکن
نه‌دن اسسین قارا یئللر؟

آرتیق سنه یاراشماز کی،
پالچیق ائولر، تورپاق جادّا،
نه‌دندیر کی، بیر ساخسی‌یا
جواهیرین ساتدین یادا؟

اسارتده یاشادیغین
کئچمیشلرین غفلتیدیر،
یئتر زیندان، یئتر زنجیر،
زیندانی یؽخ، زنجیری قؽر!