قاراچیلار

سیز چؤللرده، بیز شهرده چۆرودوک،
دئیین گؤروم، ماجارمیسیز، یوخسا تۆرک؟
تانری سیزی قاراشینمی یاراتدی،
یوخسا قارا گۆنلر سیزی قارالتدی؟
یاخود حسرت آتشینده یاندینیز
هم سولطانی، هم تانرینی داندینیز.
دیوان توتدو سیزه مگر ارنلر؟
ائل باغیندان یئتگین مئیوه درنلر...
ارنلرین اۆزون خانلار آغارتدی،
سیزی قوووب یئله، سئله بوراخدی.
عصرلردن بری چؤلده یاشارسیز
چؤلدن کؤچوب اوجا داغلار آشارسیز.
نه اولدو کی، قاراچیقلار قوردونوز؟
یاسالارا بونجا قارشی دوردونوز؟

فلک سیزین داشینیزی آتیبدیر،
آجلیق، اؤلوم کیمینیزده یاتیبدیر.
نه‌دن ماشا، الک، خلبیر ساتاراق
اله‌ییب اون کپگینه قاتاراق.
قاپی-قاپی گزرسینیز هر سحر،
اولاجاقدان وئررسینیز خوش خبر.
حئیران-حئیران دولاشارکن دۆنیادا
وعد ائده‌رک «شیرین»لری «فرهاد»آ
سیزدن باشقا بو عالمده ائو قؽزی،
بختیاردیر، ایشیقلیدیر اولدوزو.

سیز قاتلانان ظۆلمه دؤزمز قوللار دا،
نه واختادک سۆرونمه‌لی یوللاردا؟
آج قارینا دیارلاردان کئچیرسیز،
قوناق ائتمز سیزی نه رئی، نه تبریز...
گلین بیزیم ائللر ایله تانیشین،
قئیدی آتیب بو عصرله یاناشین!
سیتم سؤزون اۆستونوزدن سیلینیز،
بیر دانیشین گؤرک، نه‌دیر دیلینیز.

ایللر بویو دیار-دیار سئیر ائتمک،
چادیرلاردا یاشایارکن غریب تک،
هئچ یاراشار اینسان آدلی کیمسه‌یه؟
سونا چاتسین هم قاراچیق، هم پیه!
ائللر، دؤنون یوردا، یوردلار گۆللنسین!
آشیقلارین صدف سازی دیللنسین.
ایشیق گلسین، پاریلداسین آینامیز،
قؽزیل گۆنش دوغسون، گۆلسون دۆنیامیز!