گۆن باتارکن قؽزیللانان چایلاردا
گۆل آچاردی یازین گؤزل آخشامی.
اوزاداردی منه شعرین پریسی
شراب ایله دولو، آلتون بیر جامی...
من مست ایکن، تارلالاردان دویاردیم:
بؤجکلرین عاشیقانه نغمهسین...
ائشیدردیم هم ده یاشیل درهدن،
مئشهلردن آخیب گئدن سو سسین.
بۆرونرکن یوللار ناخیر کئچنده،
تورونج رنگلی بولودلانان توزلارا.
ناخیر یولدان اؤتوب، توزلار یاتارکن:
چمنلیکده راست گلردیم قؽزلارا.
او قؽزلارین ان عیشوهلی گؤزلی،
اوزاداردی منه بیر داغ چیچگی...
من او گۆلو بیر ساخسیدا ساخلاردیم...
اولسون دئیه اوتاغیمین بزگی.
آی دوغارکن کؤلگهلنمیش سولاردا،
آیین گۆموش ایشیقلاری تیترردی.
داغ چیچگی وئرن نازلی قؽز منه
شراب ایله دولو بیر جام وئرردی.
من مست ایکن او دیلبرین سسینده...
شعرین مرموز، درین سسین دویاردیم.
او، یاتارکن عشقین سؤنمز رنگیله،
شعرین ایپک پردهلرین بویاردیم...