کیملردیر؟

گئجه واختی اولدوزلاری سایانلار،
بولاقلارین نغمه‌سینی دویانلار،
اؤز عؤمروندن اوسانانلار، دویانلار،
صاباحاتک اویاق قالان کیملردیر؟

دنیز جوشوب قابارارکن دالغالار،
بوز سولاری آی ائدرکن زرنیگار،
گئجه‌لرین آهنگیله بیقرار،
پروانه تک شمعه چارپان کیملردیر؟

قؽزیل، ساری یارپاقلاری داغیدان،
سولار اۆسته کهربایی بیر خزان
بیر آلاگؤز، ساری گۆله اوخشایان
افسونونا مفتون اولان کیملردیر؟

آخشامچاغی توزلو یولدا سۆرونن،
اوزاقلاردان شۆبهه‌لر تک گؤرونن،
قارانلیغین اؤرتوسونه بۆرونن،
اوزون-اوزون فیکره دالان کیملردیر؟

گؤزللیکدن سرمست اولان، اولمایان،
یار عشقیندن سارالمایان، سولمایان،
بیر نغمه‌یله گؤزو یاشا دولمایان،
شاعیرلری دلی سانان کیملردیر؟

شاعیر سؤزون هر دینله‌ین آنلارمی،
شعرده‌کی گیزلی قالان مین غمی؟
آنلامایان دئییل کؤنول محرمی،
نامحرمه همدم اولان کیملردیر؟