یاز

«حئیدربابا!» یاز گۆنشی پارلاییر،
گۆله دولموش یاشیل باغلار، گؤی چاییر.
قوشلار اوخور چیچکلنمیش باغلاردا،
سۆرو اوتلور دره‌لرده، داغلاردا.
سو سسیندن چؤلده قولاق توتولور
ایلیق کۆلک دام-باجانی قورودور.
یئنه کوتان ایشه دۆشموش تارلادا،
گۆللو تومان، یایلیق اوچور هاوادا.
نه ائل اۆچون، نه یورد اۆچون، شان اۆچون
آرواد، کیشی چالیشیرلار خان اۆچون.
«حئیدربابا»، کندلی خانا بورجلودور،
بیلیرسن کی، بورجلو نامرد قولودور.
تۆستولرسه اونون بو گۆن اوجاغی،
بورجا گئدر صاباح قابی، قاجاغی.
ظۆلم الیندن مگر شیرین سو ایچر؟
قارا گۆنلر مگر اوندان واز کئچر؟
او زامان کی، دومان داغی بۆرویر
پالچیق دامدا اونون جانی چۆرویر.