کندیمیزده اولوب کئچنلر

«حئیدربابا» شاعیرینه

آخشام‌اوستو داغلار بنگ-بنگدیر،
هر یئر گؤی اوت، هر یئر گۆلدور، چیچکدیر.
توز قوپاران یولدا قویون، اینکدیر،
بیر چوباندیر دره‌لرده نئی چالان،
جینگیلددن داغی، داشی سس سالان.

گۆنش قؽزیل ایشیق ساچیر یاماجا،
کۆلک اسیر اوزاقلاردان آستاجا،
توخونارکن هر بوداغا، آغاجا،
گۆل یارپاغی سولار اۆسته النیر،
باتیر گۆنش، سولار قانا بلنیر.

بیر اینجه قؽز گئدیر بولاق باشینا،
چاتمیش بو ایل اون دؤرد، اون بئش یاشینا.
کیم وورولماز گؤزلرینه، قاشینا؟
بو یئرلرین اودور گؤزل ببگی،
چمنلرین یئنی آچمیش چیچگی.

قاش قارالیر، آی مئشه‌دن باخمادا،
دورو سولار دره‌لره آخمادا،
چؽراق یانیر، هر کومادا، داخمادا.
ایشیقلانیر قارانلیقدا بو گئجه،
توی توتولور سامانلیقدا بو گئجه.

های-کۆی قوپور، دام اۆستونده اود یانیر،
گؤرن اودو یانغین سانیر، آلدانیر.
آرواد، اوشاق، کیچیک، بؤیوک توپلانیر،
لاکین بو اود نه خانیندیر، نه بگین،
بو آلوولار ایشیغیدیر شنلیگین.

آشیق آلیر کؤهنه سازین الینه،
قوشما قوشور گؤزل-گؤیچک گلینه.
آل اۆزونه، زرلی-پوللو بئلینه،
یاللی گئدیر بۆتون قؽزلار، اوغلانلار.

گئجه کئچیر، کاروان کئچیر یوللاردان،
باخیر کنده اوزاقلاردان یارادان
اودلار سؤنور، داغ آغاریر، گۆلور دان،
لامپا یانیر یالنیز اوزاق بیر ائوده،
بزنکلی، تمیز و آغ بیر ائوده.

شفق دۆشور قؽزیل داغا، بوز داغا،
گۆنش دوغور، ناخیر گئدیر اوتلاغا،
تزه گلین، او دا گئدیر آلاغا.
تزه بگ ده داغدا قویون اوتاریر،
باخیب دۆزه سئوگیلی‌سین آختاریر.

بیر آی سونرا ایستی دۆشوب یای گلیر،
بیچینچی‌یه ائودن چؤرک، چای گلیر،
سحر گۆنش، آخشاملاری آی گلیر.
بوغدا بیچیر، آرواد، کیشی تارلادا،
یورور خالقی محصول ایشی تارلادا.

اوراق دۆشور ایشه، سۆنبول توپلانیر،
یئل اسرکن آل اؤرپکلر ساللانیر،
باغدا اۆزوم، شافتالیلار آللانیر.
آرابالار مئیوه، بوغدا گاه چکیر،
کندلیلرین اوشاقلاری آه چکیر.

سئل سولاری دره ایچره دورولور،
بوغدالاردان چؤلده قالاق وورولور،
چای باشیندا خانا چادیر قورولور.
خؽرمان اۆسته گلیر خانین نؤکری
بیر جاوانا دئییر: — آده، گل بری.

گئت صنمی گؤندر خانین یانینا،
آند ایچیرم بؤیوک خانین جانینا،
گؤندرمزسن، بولاشدیررام قانینا.
خان چادیردا بی‌کس قالیب، تک قالیب،
اۆرگینی بی‌کسلیکدن درد آلیب.

ائل ایچینده بو سؤز دۆشور دیللره،
چوبان وورور اؤزون سویا، سئللره،
آرواد ایله کؤچور اوزاق ائللره.
آناسینی کندده یالقیز بوراخیر،
پالچیق ائوده آج و سوسوز بوراخیر.

ساکیتلیکدیر، سحر هر کس یوخودا،
ارباب گلیر کنده، هم ده کندخودا،
گۆناهکاری توتوب دئیه، قورخودا.
لاکین گؤرور هامی اولوب بیقرار،
چوبان کؤچوب: «له‌له یوخدور، یوردو وار!»

شاللاق وورور آناسینا چوبانین،
آتش وورور کوماسینا چوبانین،
پئیغام وئریر آتاسینا چوبانین:
— قاییتمازسا اوغلون کنده بو آخشام،
گئتمه‌لیسن قبره سن ده بو آخشام.

خالق توپلانیر، قوپور یامان فیرتینا!
خان بلنیر خؽرمانگاهدا آل قانا.
ظنّ ائتمه کی، بو داستاندیر، افسانا.
آلیشاندا خالقین تمیز اۆرگی،
باسار، قؽرار هم خانلاری، هم بگی.

کندیمیزین اۆفوقلری آینا تک،
بوستانیندا آچار اونون گۆل-چیچک،
کیمسه تاپماز اوندا نه سۆد، نه یئمک.
اوندا اولان بۆتون نعمت خانیندیر،
بو گؤردوگون دؤولت، حشمت خانیندیر.

تمدن ده اثر یوخدور بو کندده،
آجلیق، اؤلوم، وحشت چوخدور بو کندده،
خان گؤزونده کندلی اوخدور، بو کندده.
او اؤلکه کی، خالق قانینا بویانا،
لعنت اولسون اونون داشین قویانا.

کندلی ارباب کؤرپوسوندن کئچممز،
بیر ایچیم سو ایجازه‌سیز ایچممز،
اؤز اکینین اؤزو اۆچون بیچممز.
مادیانلار، آتلار، دایلار خانیندیر،
اۆزوملوکلر، باغلار، چایلار خانیندیر.