بیر عرب ساراییدیر

I

بیر عرب ساراییدیر، قاپیلار اویما-اویما،
اؤنونده مرمر حووض، اۆستونده یاشیل آسما.
قۆبّه‌لر گؤی چینیدن، بولودسوز گؤیه بنزر،
رؤیا تک آینالاردا آل-الوان کؤلگه گزر.

تونجدان بیر آویزه ایکی قۆبّه‌دن آسیلدی،
سالونا زینت وئرن قؽرمیزی بیر خالیدی.
مینالی قندیللردن تؤکولور آلتون ایشیق،
حووضون سولاریندا ایشیقلار قؽریق-قؽریق.

عود چالیر سمرا بیر قؽز، گؤزلدیر، یوخدور اشی،
خلیفه مسند اۆسته، سئیر ائدیر اوجا عرشی،
آچیلیر هر طرفدن قاپیلار بیرر-بیرر،
گؤرونور رقّاصه‌لر، بیری آغ، بیری اسمر.

عود سسی اوجالدیقجا باشلانیر عرب رقصی،
شنلدیر خلیفه‌نی قؽزلارین اینجه سسی.
سانکی آی طۆلوع ائدیر، پرده‌لر آچیلینجا،
گؤرونور گؤزل ساقی، شهلا گؤز، بویو اوجا.

دیز چؤکوب شراب تؤکور بۆللوردان قدحلره،
خلیفه مبهوت قالیر باخدیقجا او دیلبره.

II

بیر آیدیر واحه‌لرده چؤللرده کۆلک اسیر،
آج قالیب، سوسوز قالیب، هر یئرده قبیله‌لر.
امیرین آداملاری یول کسیب، سویور کاروان،
ایسته‌ییر آغیر وئرگی بدوی یولچولاردان.

هر یئرده یؽرتیق چادیر، هر یئرده چوراق کندلر،
هر یئرده سولغون بوستان، هر یئرده قودوز ایتلر.

شهرده نه بیر حکیم، نه ده بیر مکتب واردیر،
بو زنگین مملکتده ائللره عرصه داردیر.
ساتیلیب اجنبی‌یه اؤلکه‌نین ثروتلری
میلّته دیوان توتور شاپقالی بیر سرسری.

ائللرین وار یوخونو اوغورلاییر هر گۆن امیر،
بیر خوروز اوغروسونون میر غضب الین کسیر.
هر گۆن بیر توفان قوپور، دۆنیانی ظۆلمت بۆرور،
مین ایلدن قالما قانون اؤلکه‌ده حؤکوم سۆرور.

III

قبیله یاس ایچینده، سارایدا شنلیک واردیر،
اۆفوقسوز بو چؤللرده ائللره عرصه داردیر...
گئجه‌دیر، یوردلار ایچره چؤرک یوخ، چؽراق یوخدور،
سارایدا لامپا یانیر، سۆفره‌ده یئمک چوخدور.

ایچیلن قؽزیل مئیله قوناقلار داغلاشیرلار،
ان گؤزل گؤبک اۆچون خانیملار باغلاشیرلار.
یاریدان کئچمیش گئجه، حق قوشو تسبیح ائدیر،
قاراشین بیر گؤزلله امیر ده قالخیب گئدیر.

یاتاغا گیریر امیر، سارایدا یاتیر هامی،
اوزانیر اینجه بیر ال سؤندورور قؽزیل شامعی.