I
آخما ایرماق، من ده سنه یولداشام،
گؤتور منی، ائله بیل کی، بیر داشام.
سن داغلارین آغیر یۆکون چکیرسن،
بولاقلارین سرین سویون ایچیرسن.
داش دییلم، یارپاق قدر یۆنگولم،
یولون اۆسته دۆشن توزلو بیر گۆلم.
بیر دامجییام، بولودلاردان ائنمیشم.
بیر کؤلگهیم، کنارینا سینمیشم...
آخما ایرماق، دایان، سنه سؤیلهییم،
بودور منیم ایلتیماسیم، دیلگیم:
— باغلییام من سنین دوغما ائلینه،
وئرمه منی، آمان دۆشمان الینه...
قانادینا آلیب گزدیر هر یانی
گؤتور منی قانادلارین قوربانی،
اوردا قؽزیل گۆللر، بوردا قؽزیل قان،
گۆن باتمیشدیر بوردا، اوردا آچیر دان...
II
من یوماراق دالدیم گئجه دریایا،
دریا دئییل، بیر دهشتلی رؤیایا...
آخینتیلار سسین بیر آن دینلهدیم،
پردهلندی دنیز، آرتیق بیلمهدیم.
کؤلگه دۆشور، کۆرک سسی یۆکسلیر،
بیر بالیقچی اوزاقلاردانمی گلیر؟
یوخسا سودا آی ایشیغی ترپنیر؟
بالیقلارلا بیر ال سو ایچره ائنیر.
— بو ال کیمین؟ کیمدیر منی قورتاران؟
بوراخ، — گئدیم، — دنیز جوشوب، ایستهییر قان!
قوربان دئیه دالغالارا آت منی
یا ایسترسن خزریلره سات منی...
اونوتموشسان اجدادینین عادتین؟
اسگیلرین عیبادتین، بدعتین؟
او زامان کی، خضر قوربان آتاردی:
اویماق، اوبا مورادینا چاتاردی.
باخ گؤر سنه یالواریرام ائی منجی،
بیر کؤلگه سان منی، یاخود بیر اینجی...
ایستهییرسن سویا بوراخ باتیم دا،
یا سات منی، سون گۆنومه چاتیم دا...
آتما منی عۆمّانلارا، دئمه قول،
دوستلوق ایله دۆشمنچیلیک آیری یول.
قوی شعریمله اوتلاقلارینیز گۆل آچسین.
بیر اولدوز دا گؤیونوزده نور ساچسین.
قوی بولودلار داغ آردیندان یول کسسین،
شیماللاردان سرین-سرین یئل اسسین.
قاوال سسی اوزاقلاردان یۆکسلیر،
قویون، کئچی یاشیل اوتلاقدان گلیر.
بیر یورددایام، ماوی عطیر تک بویوندا
شاهیدم من بیر گؤزلین تویوندا.
خالچا ایله بۆتون ائو، یورد بزنیب،
یول اۆستونه گۆل یارپاغی النیب.
آشیق چالیر سازدا خضر نغمهسی،
نه گؤزلدیر خضرلرده ساز سسی،
مخمر دونلو، گئن اتکلی گؤزللر،
یان باخاراق قوناقلاری سۆزرلر...
رقص ائدرکن قؽزاریرلار، سولورلار،
بیر باخیشلا همین عاشیق اولورلار.
من بیر قوناق، ائو صاحیبی مهریبان،
قوناق سئون اولور، البت، تۆرکمان.
سن گۆندوزو دانیب، دئمه گئجهدیر،
گؤرورسنمی قوناق سئومک نئجهدیر؟
بیر دئ گؤروم، اودوموزلا یاندینمی؟
بختیارکن اؤز ائلینی آندینمی؟
نهدن بیزی اوددا گؤروب گلمهدین،
یولچولاردان سوروب، سوراق گلمهدین؟
آلاچیغیم یاندی، گؤردون تۆستوسون،
یاخلاشمادین... بوغدو منی قارا گۆن!
هئچ اولمازسا مایاک کیمی پاریلدا،
یاغماسان دا شیمشک چاخیب گورولدا!