بایاتیلار

I

بیر گۆن وارمیش، بیر گۆن یوخ،
گۆن دوغاندان چؽخارمیش.
یازدان، یایدان سونرا دا
گؤرونرمیش پاییز، قؽش.

گؤم‌گؤی خزر سویوندا،
یئلکن آچارمیش یاتلار.
چادیرلارین ایچینده
یاشارمیشلار بایاتلار.

بیر گۆن یئنه بو گۆن تک،
دؤنرمیش چرخ-فلک.
یایلاقلاری بزرمیش،
یاشیل چمن، آل چیچک.

چینار کؤلگه سالارمیش،
هم پاییزین، هم یازین.
یئردن قالخیب هاوادا
توراغای چالارمیش سازین.

گۆن بولوددان باخارکن
قوس-قزح گۆلرمیش.
کاروان کئچرکن یولدان
آلا کؤپک هۆررمیش.

II

خیرمن سونو چرچیلر،
آیین-اویون ساتارمیش.
داغدا، باغدا سئویشن
مورادینا چاتارمیش.

بیچیلرمیش مخمل دون،
جاوانلارین بویونا.
اوزاق ائللر گلرمیش
قؽز-گلینلر تویونا.

ائل شاعیری قوشارمیش
بایاتیلار، ماهنیلار،
هر شعرینده گۆلرمیش
قؽزیل خزان، گؤی باهار.

قالاق-قالاق اود یاخیب
گنجلر بۆتون اوینارمیش.
تویا گلن قوجالار
کئچن گۆنو آنارمیش.

شام یانارمیش ائولرده،
داغدا گَوَن چؽراغی.
سۆسله‌نیلمیش ایپکله
ایشیق، گلین اوتاغی.

III

«بایاتلار»ین دؤوروندن،
زامان آشمیش، گۆن کئچمیش.
ائللر اؤلوم الیندن
آجی-آجی مئی ایچمیش.

لاکین توفان قوپموشسا،
قورومامیش کؤکوموز.
بوداق وئرر، گۆل آچار،
باهار و قؽش کؤکوموز.

آشیق شعری ائللری
ائدرمیشسه بیقرار.
یازار ساهیر بو گۆن ده
عصره اویغون ماهنیلار.

ساز شاعیری قدیملر
دئییرمیشسه «بایاتی»
من ده «بایاتی»لارلا
دیریلدرم «بایاتی».

***

اورتالیق کؤلگه‌لندی
یئل اسدی، گۆل الندی
یار بیزه قوناق گلدی
چؽراقلار شؤعله‌لندی.

کؤلگه‌لر پرده-پرده،
قولاق وئر، یازیق دده
زیندانا دۆشن قؽزین
سولموشدو بیر گئجه‌ده.

یوللاردیر چالا-چولا
ساغدان دؤن چاپاق سولا
گۆل کیمی جاوانلاری
چۆروتدو قؽزیل قالا.

پرده‌ده دئییر بیری.
— کیم اؤلمیش، کیمدیر دیری؟
آخشامدی، لامپا یانیر
گؤرونور یارین یئری.

کؤپکلر آلا-بولا،
خان قالا، خاتون قالا
هر آخشام نئچه جاوان
اؤتورور قؽزیل قالا.

آنالار ائدرلر آه،
«ائوین»دیر ایشگنجه گاه.
شهیدلر اۆسته باخین
تختینی قوروبدو شاه.

بیر یانار جهنمدیر
او قورخونج، قانلی «ائوین».
«ائوین»ی قوران نامرد
یؽخیلسین گؤروم ائوین.

پاییزدیر درین یارا
گل اونوت، گۆل باهارا
قولاق وئر او تایلاردا
نه گؤزل اوخور «سارا».

***

چؽراق یاندیر، اوجاق قور،
کور یوخودان بیرجه دور!
قوی امگین داغیتسین،
یوردوموزا قؽزیل نور.

باتما غمه، آغلاما،
اۆرگیمی داغلاما.
قوی باغریمدان قان آخسین،
یارامی سن باغلاما.

اییل-اییل، اؤپ منی،
ایستر اۆرگیم سنی،
سنسیز نئیلر خاطیریم
گۆلوستانی، چمنی. »

سن بیر اولدوز، گۆنشسن
روحومدا بیر آتشسن.
یادا وارسان، قورتارمام،
آل قانینا بولاشسان.

داغلار اوجا، گؤی اوجا،
قونور بیر قوش آغاجا.
یوردوموزدا چوخ شیکار
تۆستوله‌ییر هر باجا.

خالچا توخور گلینلر،
دنه دولور اکینلر،
گۆللندیریر حیاتی
دۆنیادا سن کیمینلر.

گئتمه گۆنش، بیر دایان،
سنسن گۆللری آچان.
سنسیز دۆنیا قارالار
پاریلداماز آسیمان.