وطنین ماتمینده

قؽسا بیر زاماندا باهار تک
چیچکلنن گؤزل یوردوموز
سویوق قبریستانا بنزه‌دی،
داغیلدی دومان تک اوردوموز.
گۆن چؽخاندان قارا یئل اسدی،
یؽخیلدی قورغوموز، ائلیمیز،
اودلاندی، تالاندی خوی، تبریز،
اورمی آخار سولار دیاری،
گۆلو سولوب، رنگی سارالدی،
هر گۆن، هر گئجه قاپیمیزدان
آجلیق، اؤلوم گیردی ایچری.
هئچ اونودولارمی او گۆنلر؟
جنوبا یوللانان سۆرگونلر
کیم اونودا بیلر او قؽشدا؟
آخشامادک قاردا، یاغیشدا،
قارا زیندانلارین اؤنونده
یئره سریلن آروادلاری.
گؤرورکن قؽرمیزی گۆن سؤندو،
ایمپئریالیزم گۆلوب سئویندی...
اول دیشلری دۆشموش کافتارین
گؤزو ائولیلره ساتاشدی...
ایمپئریالیزم بیزه نه وئردی؟
— فلاکت، آجلیق و قارا گۆن.
قان ایزلرینه باخ، بیر دۆشون،
تانی دۆشمنینی، ایلانی!
سنین امگینله بسلنمیش
«پارازیت»این اتی و قانی...
گۆنش گؤره بیلمز بایقوش،
قؽزیل-چین کؤپگی قودورتموش.
او امیری، ساتانلاری
قانادی آلتینا آلمیشدیر...
لاکین یاندیرماقدان نه چؽخار؟
قؽزیل قورغولاری کیم یؽخار؟
قارانلیقدان چؽخان گۆنشلر
اونون قاماشدیرار گؤزونو.
او یارالی جاناوار کیمی
داشدان-داشا چؽرپار اؤزونو.
بوراخ چؽرپسین، چؽرپسین شئیطان،
قوی محو اولسون، اونو توتموش قان...