سحر ائرکن آلاچیقلار قورولموش
«قارانقو»نون کناریندا، اوتلاقدا.
شفق گۆلور سودا، سهند اویانیر،
صدف رنگلی، اینجه ایپک یاتاقدا.
باخیر سهند، کئچن ایلکی دوستلاری،
گۆلر اوزله، اوزاقلاردان سسلهییر...
او بیر داغدیر، لاکین اونون اۆرگی،
اینسانلارا درین سئوگی بسلهییر.
دئییر: — گلین، سۆرولری اوتلادین،
چمنلریم، چاییرلاریم سیزیندیر.
آجلیق گؤروب، کورلوق چکن اوبالار،
گلین ایچین، بولاقلاریم سیزیندیر.
سیزین اۆچون یاماجلاری بزهییب،
گؤزل قوشلار بسلهمیشم سیزلره،
چؽراق کیمی قؽزیل لاله یاندیریب،
یاشیل خالی دؤشهمیشم هر یئره.
گلین قورون چادیرلاری، بوراخین
اوتلاسینلار اوتلاقلاردا آت، قویون،
اوشاقلاری بوراخینیز گزسینلر،
اود یاندیریب قارانلیقدا، توی توتون.
سیزدن اوزاق، قارا گۆنلر گؤرموشم،
چوخ چکمیشم حسرتیزی، بیر ایل وار،
دئیین گؤروم، بو بیر ایلده نه گؤردوز؟
نه ائشیتدیز بو دۆنیادا، اوبالار؟
گلین ایچین سولاریمدان دویونجا،
داغین مالی یئللریندیر، سئلیندیر،
قایالاریم، سویوم، اوتوم، اوتلاغیم،
اتگیمده بسلهدیگیم ائلیندیر.