نیل چایی منظومهسیندن پارچالار
آشین، داشین، دئیه، نیلین سولاری،
چیچکلنسین میصرین توزلو باهاری.
قوجا کاهین گۆناهلارا باتاردی،
بیر گنج قؽزی نیل چایینا آتاردی.
چایدا اۆزن تیمساح اودوب نیگاری،
آزالمازدی او ایل نیلین سولاری...
بوغدا، پامبیق آدام بویو بیتیردی،
زنگین اولان مورادینا یئتیردی.
لاکین تاخیل بول اولسایدی یئنه ده
یئتیشمزدی اکینچییه بیر هئیبه،
ایستر چبتی، ایستر یونان قوللاری.
آج قالماقدان اولاردیلار ساپ-ساری،
فلّاحلارین گؤیچک، شیرین قؽزلاری
اینسانلیغین یاشیل باغینین باری،
یالین آیاق گزردیلر هر یانی،
سولاردیلار خیرمالیغی، بوستانی،
وئرردیلر یئم قوشلارا، حئیوانا،
ایپک، کیلیم توخوردولار فیرعونا.
قابیق قویوب قؽزغین گۆنش اؤنونده
سئوینمزدی کؤنوللری بیر گۆن ده.
قارا چؤرک، سیرکه یئییب بئلهجه،
قورو یئرده یاتاردیلار هر گئجه.
او قؽزلارین اۆرگینده گۆل آچان،
آرزولارین باغی اولاردی خزان.
لاکین... چیرکین قؽزی هر آخشام
یاشیل باغدا ائدردی ناز و خۆرّام.
گئیینردی ایپک، زری البسه
صرف ائدردی واختین بزگه، سۆسه،
فلّاحلاری او بیر حئیوان ساناردی،
گؤزللری قؽسقاناردی، یاناردی.
ائشیتمیشدی کاهینلردن او...
اونون اۆچون توتوب بو یئر، گؤی قرار،
او گۆلنده آچار باغدا چیچکلر،
اونون اۆچون سولار جریان ائدر.
فیرعون، اونون اولو باباسی هله
غضب ائتسه دۆشر یئره زلزله.
او گۆنشدن آیری بیر یئرمیش، بیر آلوودور،
اونا باخان اولار همن گؤزو کور.
میصر اونوندور، حبشیستان اونوندور،
چایلار، باغلار، مئشه، بوستان اونوندور.
نئچه مین ایل کئچمیش او گۆندن بری،
قارالمیشدیر زمانهنین دفتری.
دگیشمیش یاتاغینی نیل چایی،
قوما باتمیش، فیرعونلارین سارایی.
مومیالی شاهلار، یالنیز قالمیشلار،
داش تابوتدا درین خیالا دالمیشلار.
شام چؤلوندن بیر گۆن گۆنش چؽخاندا،
گؤی ارشلیم سرمست یاتان زاماندا،
سیچانلار تک، یاواش، سسسیز، بیخبر
آغ عسگرلر دروازادان گیردیلر.
قورخو دۆشدو ننتیلرین ایچینه،
گئدرمز اولدو، او ایل بیر کس بیچینه.
یاندی شهر، قصبهلر آلیندی،
ویرانهلر اۆسته ناماز قؽلیندی...
خنجرلندی بیر چوخ قؽزلار، قادینلار،
خالقین پالچیق ائوی اولدو تاریمار،
اوشاقلاری دیری قوما گۆمدولر،
قویمادیلار نفس چکن بیر نفر.
قصرلردن، فیرعونلاردان یادیگار،
یاشیل باغلار، اوجا مرمر سارایلار،
ایپکلرله بزهنیلمیش اوتاقلار،
آینادار، گؤهر نیشان دوداقلار.
اودلاناراق ویران اولدو، تالاندی،
یئرلرینده قارا تورپاق قالاندی.
قان دریاسی اولدو نیلین سولاری...
قانلی سولار آخدی دریایا ساری.
آیاقلاندی بوستانلیقلار، باغچالار،
مزیرهلر اولدو بۆتون تاریمار.
بیر سنهلیک اکینچینین امگی
هئچه گئتدی، الدن چؽخدی چؤرگی،
باشقا دؤوره آیاق باسدی، او ایل میصر،
ایسلاملاشدی، خریستیان، یاشیل میصر،
یئردن یئنی فئوداللار گؤیردی،
خالقین آرتدی، یئنه مؤحنتی، دردی.
پارازیتلر یئنه خلقه باش اولدو
یئنه هامان کاسا، همن آش اولدو!
جاریهلر بۆرجلردن آتیلدی،
گؤزل قؽزلار بازارلاردا ساتیلدی.
لاکین اولما مأيوس، دایان بیر فلا
کئچر بیر گۆن، نه خان قالار، نه ده...
دگیشمزسه آسیمانین مداری،
دگیشردی بو دۆنیانین قراری.
یاشیل میصیر، حبشیستان، زنگیبار،
ظۆلمون قانلی پنجهسیندن قورتولار.
نیلین قؽزیل دالغالاری نهایت،
ائدر سنین بوستانینی بیر جنّت،
آچار پامبیق، سۆنبوللنر بوغدالار،
ان نهایت، تورپاق فلّاحه قالار.
آشسین نیلین سویو، تاخیل بول اولسون!
ایشیقلی گۆن، داما، باجایا دولسون...