یارین اتکلری

دۆشونجه‌لی کؤنلوم، یاتماز، دینلردی،
گئجه‌لرین درینلشن سسلرین...
آغیرلاشان نظرلریم گؤرردی...
سودا آیین گۆموشلنن افسرین.

یارپاقلارین خؽشیلتی‌سین آندیران،
اینک سسی دویولاردی چمنده...
یابانی گۆل عطری یولوب ساراردی...
کۆسکون یاریم کناریما گلنده.

نئجه بیر ال گئجه شامعی سؤندورور،
تا گؤرمه‌سین کیمسه عشقین پرده‌سین.
گئجه داغدا سؤندورردی مهتابی،
سوسدوراردی باغدا نسیمین سسین.

لاکین، بو گۆن او سسلری دویارام،
یازین سرین نفسیندن گئجه‌لر...
یئنه هر شب خیالیمین یولوندا
یارین ایپک اتکلری سۆرونر...