یولدان ایراق بیر یئرده، مئشهلرین قوینوندا،
سو باشیندا قورولموش، سحر آطلاس چادیرلار.
چادیرلارین ایچینده، گؤزل اۆزلو کنیزلر،
مین جۆر عیشرت اسبابی، امیر اۆچون حاضیرلار.
چادیرلارا دؤشنمیش زر بافت، ایپک خالچالار،
خالچالارا سپیلمیش قؽزیل گۆللر یارپاغی.
گۆن دوغمادا، امیر ده، بیر گۆل اۆزلو دیلبرله،
باغچالار ایچره گزینیر، بیر یوخاری، آشاغی.
قوشلار تک-تک اوچورلار، آغاجلارین آردیندان،
سو سسیله برابر، قؽزلار سسی یۆکسلیر...
آهنگدار بیر هاوا، یاواش-یاواش تیتررکن:
امیر باشقا بیر قؽزا، چمنلرده راست گلیر!
ارغوانی بیر غمگین، گؤزل بیر پری،
اوزون کیپریکلر آلتی، سۆزور یولدان گلنی.
سانکی قوجا امیره، سورور بایغین نظرله،
«یانینداکی گؤزلی، چوخ سئویرسن، یا منی؟»
امیر گۆلور... یانیندا دوران گلین قؽزاریب،
قانلی آلا گؤزلرله رقیبهسین سۆزدورور.
مین گؤزله بند اولان، سرسم عرب امیری
بیر گؤزلی دوتمادان، بیر آهویی اۆرکودور!
یاشیل اؤرتو مئشهلر، قؽزیللاشیر گۆنشله،
سو باشلاری قؽزلارلا، چیچکلنیر، گۆللنیر.
ساز نغمهسی اوجالیر — بیر جاریه اوخویور،
اونون عکس صداسی، داغلار ایچره سسلنیر.
بیر قؽز چؽخیر پردهدن، یاری چؽپلاق، زؤهره تکی
اوزون، سیاه ساچلاری، حلقهلنمیش، بورولموش،
او بیر گؤزل رقّاصه، بیر راجهنین قؽزیدیر،
امیر اونا وورغونکن، او «اؤزگه»یه وورولموش!
ساز نغمهسی اینجلیر، قاوال سسی اوخشاییر،
گؤزللرین کؤنلونده، یاتان درین سئوگینی.
پیالهلر مئی ایله دولوب، سونرا بوشالیر،
ساقی شراب وئریرکن: — ساتیر «امیر» دینینی.
ساقی اون دؤرد یاشیندا، بیر آفتدیر عربده،
شاعیرلرین شعریدیر، عشقلرین رؤیاسی.
دانیشارکن سانارسان، اونون شیرین سسیدیر،
گئجه باغلار ایچینده، ائشیدیلن سو سسی،
یاشیللانان مئشهلر، پردهلنین، آخشامدیر،
قؽزلار سراپردهده، «امیر» باغدا تک قالمیش.
قوشلار اوچموش باغلاردان، سولار دۆشموش آخماقدان،
پیالهلر قؽریلیب، صۆراحیلر بوشالمیش...
پردهلنین مئشهلر، پردهلندی خئیمهلر...
امیر آطلاس چادیردا، سرمست دالمیش اویغویا.
جاریهلر هر نگی، بیر قلمین قوینوندا،
گئجه اولموش... اولدوزلار تؤکولموشلر ده سویا.