بیر کئچن بولودون، گؤز یاشلارینی،
قانا-قانا ایچیب، آچیلان چیچک.
بو قورو چؤللرده، آچیلدین هئیهات،
سنه کیملر آرتیق نظر ائدهجک؟
سؤیله ای غریب گۆل واحهدن کنار،
آچان بیر گۆل ایله اولارمی باهار؟
یاخیجی قوملارین بیر بوجاغیندا
بسلرسه ده خیلقت، آتشین بیر گۆل،
سؤیله، نهدن دهرین گۆلوستانیندا
توش اولمادی سنه بیر دلی بۆلبول،
اومما آسیماندان مرحمت، گۆلوم،
سنه گؤز دیکمیشدیر، بیر قارا اؤلوم.
نه چمنلرده و نه ده باغلاردا
گؤزللر اۆچون بیر آچیلان گۆلسن.
نه ده بولاقلارین زۆمزومهسیله،
زاواللی قؤنچهجیک گۆلمک بیلیرسن.
وارسا دا قان رنگی یاناقلاریندا
آجی تبسّوم واردیر دوداقلاریندا.
سؤیله نهدیر دردین، بیابان گۆلو؟
نهدن قوملار ایچره سن کؤک سالیبسان؟
دۆشوندورور منی قؽزیل یارپاغین
یوخسامی عشقیدن یادیگارمیسان؟
یوخسا لئیلانین سن، قانین ایچهرک
قوملاردا آچدین سن، ائی گؤزل چیچک!