سون سؤز، سون ساز

ائل شاعیری محمودا

قوراقلیغا توتولاندان، بابا دیاریندا،
منیم ده کؤشنیمین ایلک باهاری سولموشدو.
بولاقلاری قورویوب، قوشلاری سۆکوت ائتمیش،
چیچکلی کندیمیز، ائی واه، خارابا اولموشدو.

اوزون و خزانلی ایللر، باشیمدان آشدیقجا،
سؤزوم بیتیب، سازیمین تئللری قؽریلمیشدی.
قانادلارین منه گردیکجه ناموراد بایقوش،
ائله گلیردی منه، یای دومانلی بیر قؽشدی!..

منه اؤلوم شفقی گؤز دیکندن آه!
ظۆلم ایچینده نفسدن دۆشوب، بوغولموشدوم!
حوادیثین او قارا داخماسیندا، تابوتدا،
نه‌دنسه قوپقورو بیر مومیانی اولموشدوم.

سنینله غۆربت ائلینده گؤروشدوگوم دمدن،
الینله نحس تیلسیمین قؽریلدی پرده‌لری.
بولودلارین آراسیندان گۆن ایشیق سالدی
قاپیم آچیلدی و دۆشدو قؽزیل ایشیق ایچری.