یاورولاریم! ای عؤمرومو شنلندیرن، گۆلدورن،
آلنی آچیق اوغوللاریم، گؤزل، یوسما قؽزلاریم،
بیر غایهسیز اوچوروم وار، آیریلمییور اؤنومدن،
عؤمروم وفا ائتمز بانا، بلکه پک آز یاشاریم.
آرتیق بانا دار گلیور هپ شو انگین اۆفوقلر،
سانکی روحوم قاناتلانیب شیمدی پرّان اولاجاق.
قارشیمیزدا یانغین کیبی گؤرونن آل شفقلر،
احتیمال کی، یارینکی گۆن بنی سؤنموش بولاجاق.
اجل گۆجلو، بن گۆجسوزوم، کیمسه اوندان قورتولماز،
توپلاشینیز، واردیر سیزه بیر قاچ سؤزوم، دینلهیین.
گئتمهلیییم، وصیّتسیز اؤلسم روحوم شاد اولماز،
قولاق وئرین سؤزلریمه، بیرر-بیرر بللهیین.
ایلک ایستگیم: هیچ بیر زامان سئوگیدن ال چکمهیین،
اینسان اوغلو سئوگی ایچین یاراتیلمیش، دوغموشدور.
یئر یۆزونو قارداش بیلین، اینسان قانی دؤکمهیین،
بو دۆنیادا بیر قاشیق سو چوق ظالیملار بوغموشدور.
کیمسهیه کین باغلامییین، ییگیت اولون، مرد اولون،
ویجدانینیز ائلماس کیبی نور ساچاراق پارلاسین.
قونوم-قومشو، یاقین-اوزاق هر کسله همدرد اولون،
قؽریق گؤنوللری یاپین، بؽراقمییین سؽزلاسین.
ظۆلمه هرگیز یاقلاشمییین، دوغرو یولدان شاشمییین،
تانری حاقدیر، حاقّی سئور، عدالتدن خوشلانیر.
یالتاقلیغا ایمرنمهیین، کیبره هیچ یاناشمییین،
اؤز حاقینی بیلمهینلر ان سونوندا داشلانیر.
آرسلان کیبی جسور اولون، فقط حاقسیز چؽقمایین،
حاقسیزلیغا قارشی قویون، بؽراقمایین شؽمارسین.
ظالیملاری، جلّادلاری چئینهیین، هیچ قورقمایین،
تۆرک میلّتی، گؤرولمهمیش، بویون بۆکسون، یالوارسین.
باق! شو یاندا گۆلومسوین یئنی دوغموش آی نهدیر؟
شفقلرین دوغوردوغو بیر قؽزدیر کی، هر یئرده
تۆرک آدینی اعلان ایچین بیر سماوی آینهدیر،
ایشته! بیزیم تاریخیمیز… هم یئرده، هم گؤیلرده.
ای سئوگیلی قوزولاریم! سیزدن بن آیریلیرکن،
بندن سیزه سون وصیّت: هرگیز محزون اولمایین.
ویجدانیملا، ناموسوملا یاشار، حاقی بیلیرکن،
گۆجلوکمو وار هیمّتینه قاووشماقدا تانرینین!؟
ناموس، ویجدان اینسانلاردا ایکی بؤیوک قاناتدیر،
اونلار ایله آدم اوغلو یۆکسک گؤیلردن آشار.
ناموس، ویجدان بیزلر ایچین دایمی بیر حیاتدیر،
تۆرک ائلی هپ او حیسّ ایچین دوغموش، اونونلا یاشار.
بیر میلّتین تاریخیدیر کؤکو، یوردو، یوواسی،
تاریخینیز باش اوجوندان هرگیز اسکیک اولماسین.
«آلتای» داغی، «ماکان» چؤلو، هم ده «یاسین» اوواسی»[1]
بیرر آیدین صحیفهدیر، هر تۆرک گرک آنلاسین.
سۆدو تمیز، اصیل اوغول بیلمزمی کی، اجدادی
ناسیل دوغوب یاشامیشلار، نه ارلیکلر ائتمیشلر.
بیلمهلی کی، تئز محو ائدر زامان نانکور ائولادی،
اؤز نسلینی اونوتانلار چوقدان سؤنوب گئتمیشلر.
بیر میلّت اؤز کؤکو اۆسته بیتر، بؤیور، یۆکسلیر،
کؤکسوز آغاج چابوق قورور، چیچک آچماز، بار وئرمز.
باقین، گؤرون تاریخینیز سیزه نهلر گؤستریر،
هپ شرف، هپ بؤیوکلوکدور، آنجاق شاشیلار گؤرمز.
مرد آتالار ییگیتلیکده نام آلمامیش یالینیز،
تا اسکیدن اونلاردا وار علم، حیکمت هوسی.
گۆنش کیبی تاریخلری پارلاتییور، باقسانیز،
سمرقندین دارالفونونلاری، رصدخانهسی.
اوت، آرسلان یاورولاریم! تۆرک ائلی هپ شانلیدیر،
الماس کیبی لکهسیزدیر، ساقین، غافیل اولمایین.
عصر، ایییرمینجی عصردیر! وظیفهسی پک آغیر…
آرش ایلری!
قومشولار یول آلدی، گئری قالمایین!