ایلک باهار

باهار، باهار گلمیش، یئنه ایلک باهار؛
گۆللر، چیچکلر گۆلر، قوشلار اوینار.
گؤیون آلتون ساچلی قؽزی نور ساچار،
اینسانلارین توتقون کؤنلونو آچار.
داغلار، چمنلر گئیینیر آل، یاشیل؛
یئرلر، گؤیلر پاریلدار ایشیل-ایشیل.
بۆلبوللر اؤتوشور، جه-جه وورورلار،
گۆللوکلرده دۆگون، درنک قورورلار.
سئوگیلی بیر چوبان، اون بیر یاشیندا،
دۆدوک چالار آخار سولار باشیندا.
اطرافیندا قویون، قوزو هوپلاشیر،
اوینار، مه‌لر، قوشار یئنه توپلاشیر.
بیر یاندا بیر دول قادین آغیر-آغیر
خسته یاوروسونو اؤپوب اوینادیر.
بیر یاندا مکتبلی بیر چوخ قؽز، اوغلان
اویناشیب اوخوشور هپ بیر آغیزدان.
ال-اله، قول-قولا شادان اولورلار،
حاقین قۆدرتینه حئیران اولورلار.