یاخشیدیر

دلی کؤنلوم، مندن سنه امانت،
دئمه، بو دۆنیادا قالیم، یاخشیدیر.
بیر گۆن اولار، قوهوم-قارداش یاد اولار،
دئمه، اولوسوم وار، ائلیم یاخشیدیر.

بیر مجلیسه وارسان اؤزونو اؤیمه،
شئیطانا باج وئریب کیمسه‌یه سؤیمه،
قوّتلی اولسان دا یوخسولو دؤیمه،
دئمه کی، زورلویام، قولوم یاخشیدیر.

قوچاقدان اولوبسان، قوچاق اولگولان،
قادادان، بالادان قاچاق اولگولان،
آشیق اول، جومرد اول، آلچاق اولگولان،
دئمه، واریم چوخدور، پولوم یاخشیدیر.

خسته قاسیم کیمه قؽلسین دادینی،
جانی چؽخسین، اؤزو چکسین اودونو،
یاخشی ایگید یامان ائتمز آدینی،
چۆنکی یامان آددان اؤلوم یاخشیدیر.