دلی کؤنول

دلی کؤنول، نه دیوانه گزیرسن؟
بی‌وفا دیلبردن سنه یار اولماز.
دۆز چؽخماز ایلقاری، عهد-پئیمانی،
هرجاییدا ناموس، غئیرت، آر اولماز.

اۆز وئرمه نادانا، سیرّ وئرمه پیسه،
آخیر قلبین یا اینجی‌یه، یا کۆسه،
اوت بیتر کؤک اۆسته، اصلی نه ایسه،
یووشان بسله‌مکله چمنزار اولماز.

وفالی‌یا امک چکسن ایتیرمز،
بداصیل نصیحت، اؤیود گؤتورمز،
قاباق تاغی تر شاماما بیتیرمز،
بوز سؤیودده هئیوا اولماز، نار اولماز.

تکلیف اولونمامیش بیر یئره وارما،
نر اولماز مئیداندا هر بؽغی بورما،
سئیراقیب آداما سن یاخین دورما،
خاین چؽخار، اوندا دۆز ایلقار اولماز.

خسته قاسیم گۆنو کئچمیش قوجادیر،
گلن بزیرگاندیر، گئدن خوجادیر،
سرو آغاجی هر آغاجدان اوجادیر،
اصلی قؽتدیر، بوداغیندا بار اولماز.