نیگار

عشق اولسون او تیترک باخیشلاریندا
آچان چیچکلره، آچان گۆللره.
عشق اولسون بو جوشقون گنج یاشلاریندا
آچدیغین صمیمی شیرین دیللره.
سنسن شعری منه ایلهام ائدن، یار،
آند اولسون تاپدیغین وارلیغا، نیگار!

من سنی گؤردوکجه بؤیله سرآزاد
یورغون قانادلاریم چؽرپینماق ایستر.
گل کئچن دملری ائتمه‌یه‌لیم یاد.
چالیش وارلیغینی عالمه گؤستر!
سئوینجین اۆزونده اولسون آشیکار،
گۆلسون بسله‌دیگین عمللر، نیگار!

اوف، آندیم کئچمیشی، یاریلدی باغریم،
چؤکدو گؤزلریمه سۆسلو بیر خیال.
قاریشدی حافیظه‌م، قازاندیقلاریم
اولدو بیر اوچوروم، بیر درین ملال.
گؤردوم قادینلیغی مؤحنت اسیری،
کؤله‌لیک اسیری، مینّت اسیری.

چئویردیم اۆزومو بو گۆنه باخدیم،
کؤنلومه بیر باهار نشئه‌سی دولدو.
ای شرقین گؤزلی، اۆزونه باخدیم،
قلبیمه بیر چوجوق هوسی دولدو.
گؤردوم قادینلیغی کیتاب اسیری،
اۆلویّت اسیری، رۆباب اسیری.

بو گۆن گۆلومسه‌دی اسیرلر بویو
بیر بولود آردیندا قارالمیش اۆزون.
بو گۆن بوراخاراق چهلی، اویقوو،
سسلندی قلبینده جانلانان حۆزون.
سن آتدین چارشافی، دردین آزالدی،
بۆرونمک اوغورسوز کئچمیشه قالدی.

دئییرلر ساریلیب دیلکلرینه،
زحمته مفتونسان، بیر عاشیق کیمی.
امک باغچاسی‌نین چیچکلرینه
اللرین دولاشیر سارماشیق کیمی.
بعضاً سۆزوله‌رک گؤزلر، او گؤزلر
یول چکیب اوزاقدان نه خیال اؤزلر؟

دوغرودور، شعریمین اۆرگینده، یار،
چؽرپینیر حۆزنلو خفیف بیر قانات.
ای دیو آددیملاریله یۆکسلن دیار،
فیکرینی خالقیمین ذؤقیله پارلات!
چۆنکی من دئییلم یالینیز مۆقصّیر،
منی درده سالمیش او کؤهنه عصر.

قلم جوشدو، سؤزوم قالدی اۆرکده؛
اودور کی، شعریمین دَیری یوخدور.
اوخویان گۆله‌رک سؤیله‌یجک ده
«مۆشفیقده شاعیرلیک اثری یوخدور!»
خوش گۆندور چؽخالیم اۆز-اۆزه، نیگار!
سن نه سؤیله‌ییرسن بو سؤزه، نیگار؟