سالماق نظریندن منی جانانه دۆشرمی؟
سالماق نظریندن منی جانانه دۆشرمی؟
ترک ائیلهمک اؤز قولونو سولطانه دۆشرمی؟
کاکیل نه روادیر کی، کؤنولدن ائده غئیبت،
شانه گیلئگی زۆلف-پریشانه دۆشرمی؟
غمزهن لبینی دیشلهمهمیش، قانیمی تؤکدو،
قان ائیلهمهین کیمسهنه هئچ قانه دۆشرمی؟
دیل چاه-زنخدانه دۆشوب زۆلفون اوجوندان،
البته، خطاسیز کیشی زیندانه دۆشرمی؟
دئرلر کی، دهانینلا ائدیر بحث-نزاکت،
گؤرون، بو سؤز اول قؤنچهی-خندانه دۆشرمی؟
اول سرو-خورامانه کی، گزمک اولوب عادت،
بیر یول یولو، گؤر کیم، بیزیم ائیوانه دۆشرمی؟
اولمازسا اگر واقیفه بیر صدری سمن یار،
توپ ائیلهییبن باشینی مئیدانه دۆشرمی؟