تبارک الله حسن و جمال بئیله گرک

تبارک الله حسن و جمال بئیله گرک،
بو حسن و صورته هم خطّ و خال بئیله گرک.
اگر چه وجهینه تشبیه قیلمیشام آیی،
ولی ملاحت ایله بو کمال بئیله گرک.
بهار وصلینه جان وئرمیشم ز روز ازل،
سعادت ابده ملک و مال بئیله گرک.
لبین مزاجینی سورماقدا ایسترم خضری،
دییم که چشمه‌ی آب زلال بئیله گرک.
ایاغینا باشیمی سالمیشام منِ درویش،
جناب حضرتینه اتصال بئیله گرک.
اومید وصلینه شاد اولموشام فراقیندا،
حقیقت اهلینه دفع ملال بئیله گرک.
وصالینی دیلرم کام ایلن ز فضل اله،
من شکسته‌یه کام وصال بئیله گرک.
بصیرت اهلی گؤرنده قیام قامتینی،
دئدی که سرو سهی در مثال بئیله گرک.
حقیقی شرح دهانین قیلاندا روز ازل،
اونون بیانینا شیرین مقال بئیله گرک.