ازلده شوقه گتیردی منی بدایت عشق
ازلده شوقه گتیردی منی بدایت عشق،
سعادتی منه کشف ائیلهدی سرایت عشق.
ایاغینا باشیمی سالدی اول پریزادین،
یئتوردی دامن وصله منی هدایت عشق.
هر آنکه بیلمهدی یارین غمینی عین صفا،
میسّر اولمادی اول جاهله کفایت عشق.
محبّه نکتهی توحیدی کشف ائدیر فاعل،
گؤتوردی پردهی اسراری چون روایت عشق.
بیان شرحینه مستغرق اولدو جان و کؤنول،
محیطه سالدی منی گنج بینهایت عشق.
منوّر ائیلهدی ویرانه کؤنلومو عشقین،
همین بودور نظر، ای شاه من! رعایت عشق.
جفا و جوری وفادیر حقیقییه یارین،
بیر اولدو مشرب توحید ایلن حکایت عشق.