هم اؤلوم، هم ابدیت

قارشیدا چاغلایان ماوی دنیزدیر،
اوردان بیر ماوی یول اوزانیر گؤیه!
دالغالار دیلینده الهی سؤزدور،
اوچور سمالارا "سئویرم" — دئیه.

سئوگین اۆفوقلردن ائندی منیمچین،
بنزردیم دنیزده تنها یئلکنه.
اۆرکدن آغلاسام من ایچین-ایچین،
مهریبان-مهریبان گۆلمه سن منه.

عؤمرون آیری-آیری ایزییله کئچدیک،
دردلر ده، غملر ده بیزه بللیدیر،
بیلیرم جاهاندا چوخ گئج گؤروشدوک،
یاخشی کی، گؤروشدوک، بو تسلّیدیر.

اۆمید کؤرپوسوندن حسرتله کئچدیم،
سئوگی قاپی‌سینی دؤیدوم بیر صاباح.
تعجّوب دوغوردو گؤزلرده عشقیم،
تعجّوب حئیرته دؤنرمی، الله؟

یئنه بیر ماوی یول اوزانیر گؤیه.
اۆرکده تورپاغا، سمایا حئیرت.
سئوگیسه سیرّینی آچمیر کیمسه‌یه:
سئوگی هم اؤلومدور، هم ابدیت

30 دئکابر ۱۹۹۳