نئجه ویداعلاشاق، دۆنیا، سنینله

بلکه سون گۆن گلیر،
   گلیر سون آخشام،
بلکه سون شعریمی یازیرام، دۆنیا!
دۆنیادان دؤرد اللی یاپیشمامیشام،
لاپ صاباح کؤچمگه
   حاضیرام، دۆنیا!
اۆمید مجراسینی
   غمه چئویردین،
سئوگی آستاناما سن کؤلکه سالما.
دؤزدوم، ساچلاریمی
   یئللره وئردین،
سن باری گؤزومون نورونو آلما.
سنین عذابینا
   جان گرک دؤزه،
گؤزلردن آخسا دا یاش گیلدیر-گیلدیر.
عذابسیز سئوگیلر
   سئوگی دئییلسه،
عذابسیز دۆنیا دا دۆنیا دئییلدیر!
ایللر شلاله تک
   شاقراق آخیرسا،
دره گۆناهسیزدیر،
   قایا گۆناهسیز.
سئوگی محوریندن
   بشر چؽخیرسا،
اینسان گۆناهکاردیر، دۆنیا گۆناهسیز.
دۆنیا، نورا چئویر اینسان عؤمرونو،
اۆمید قاپی‌سینی
   آچ آرام-آرام.
سئوگی، محبّتی ایتیرن گۆنو،
اجلی کؤنوللو چاغیراجاغام.

29 مای - 5 ایون ۱۹۹۴