نه‌ییم وارسا - منیمله‌دیر

هیجران منده، گؤروش منده،
کدر دولو گۆلوش منده.
تانری ثروت بؤلوشنده،
منه دۆشن دردیم-غمیم،
   منیمله‌دیر!

دۆنیا اوجا، دردی درین،
قارداشی‌یام دردلیلرین.
اؤولادی‌یام گؤیون-یئرین.
نیسگیلی سونسوز عالمیم،
   منیمله‌دیر!

یئلکن آچدیم عۆمّانلاردا،
اۆزدوم جوشان توفانلاردا.
لؤوبر آتدیم لیمانلاردا،
سینیب گلن آرزو گمیم،
   منیمله‌دیر!

من قاتدیقجا ایلی-ایله،
نه‌ییم واردی، گئتدی یئله.
شۆکورلر کی، منیم هله،
بیر اۆرگیم، بیر قلمیم،
   منیمله‌دیر!

28 سئنتیابر ۱۹۹۰