باریش طالعینله!

آخشام... چیچکلیدیر
   گؤیلر چمنی،
ائنیر آیاغینا پارلاق اولدوزلار.
نئچین آغیر گۆنده آختارمیر سنی،
ائوینین دیرگی بیلدیگین دوستلار؟
باریش طالعینله، باریش، آی نبی!

باغدا نئجه واختسیز
   تؤکدو خزللر،
مئیوه‌لر نه ائرکن سووولدو، گئتدی.
سنه "قارتالیمسان" دئین گؤزللر
اوچوب سرچه‌لر تک یوخ اولدو، گئتدی.
باریش طالعینله، باریش، آی نبی!

اۆز گۆلمور،
   آچیلمیر،
       قلبده شاختا، دون،
خزری اوتاغیندا اویناییر کۆلک.
دۆنن گور زنگلردن سؽنان تلفون
بو گۆن بویون بۆکوب سوسور یئتیم تک!
باریش طالعیینله، باریش، آی نبی!

سنه ایریشردی
   ایشی دۆشنلر،
تعریفلر قوپاردی سن دینن زامان.
ایندی اونلار سنی گؤرمه‌ییر مگر؟
نیه تشخّوصله کئچیر یانیندان؟
باریش طالعینله، باریش، آی نبی!
آخی نه باش وئریب
   گؤرن جاهاندا،
نئجه قاپالیدیر سحیرلر، سیرلر.
معلوم حقیقت وار: گمی باتاندا
ایلکین سیچوووللار قاچیب گئدیرلر.
باریش طالعینله، باریش، آی نبی!

زنگینلر گؤردونمو، سن گئری چکیل،
وارین-دؤولتین ده اؤز حؤکمو واردیر،
اۆرگین دولودور — بو معیار دئییل،
جیبلرین بوشدورسا — باخ بو معیاردیر
باریش طالعینله، باریش، آی نبی!

بلکه غۆروروندور —
   گۆناهکار بو گۆن؟
غۆرور هاچان اولوب، هاچان گۆناهکار؟
فقط درین-درین سن بیر ده دۆشون،
اینسان گۆناهکاردیر، زامان گۆناهکار؟
باریش طالعینله، باریش، آی نبی!

سینه‌نی دردلره
   مردانه گر سن،
سئوگی ده، نیفرت ده مۆقدّس اولار.
آخی باریشماسان
   سن نئیله‌یرسن؟
سؤزلر ده صحرادا باتان سس اولار.
باریش طالعینله، باریش، آی نبی!

۲۰ ایول ۱۹۹۶