قارداشیم، دوستلاری دۆشمندن آییر،
اۆمیددن ایناما تمل قویولور.
دۆنیادا وطنسیز
اینسان اولماییر،
یالنیز غئیرتسیزلر وطنسیز اولور.
وطن! عؤمروموزدن او آیری دئییل!
آرخا اول، خوش گۆنده، بلالی گۆنده!
سن یالنیز دۆنیادا
سجدهیه اَییل،
بایراق قارشیسیندا، آنا اؤنونده.
وطن محبّتی
گؤیلرله تندیر،
بایراق دا، آنا دا
چۆنکی وطندیر.
سرین مئشهلردن بیز کئچیریکسه
ناحق صاف بولاقدان ایچمیریک کی، بیز.
اگر کی، بایراغی
بیز سئچیریکسه،
آنایلا وطنی سئچمیریک کی، بیز.
غضب قؽلینجینی چؽخاراق قؽندان،
اینساندا بو قدر دؤزوم اولارمی؟
وطن جان چکیرسه،
تاپداق آلتیندا
بیزیم یاشاماغا حاقیمیز وارمی؟
اۆز توتور خاریجه ذکا آخینی،
او یئرده وار-دؤولت تاپارام، — دئیه.
اونودوب وطنین
آغیر چاغینی
کاش یوللار گئتمهسین وطنسیزلیگه.
اینسان — وطنسیز،
باشدیر — بدنسیز.
بیز نهلر گؤرمهدیک تانری، آماندیر،
وطنه یادلاشان اینسانلار اولدو.
وطن نه آلینان
نه ساتیلاندیر،
حرّاجا قویولان ویجدانلار اولدو.
صاباحا اینانیر قهرمان اینسان،
او، میلّت دردینی داشییاجاقدیر.
وطنچین اؤلمگی
باجاران اینسان
وطن عؤمرو قدر یاشایاجاقدیر!
1-2 فئورال ۱۹۹۷