منو
دانیشان اللر
گل، – دئمک ایسته‌ییر، گل، — دئیه بیلمیر،
اللر دئدیگینی دیل دئیه بیلمیر.
ن.خزری
او، سیرلی سؤزلر کی،
گلمه‌ییر دیله
ائله بیل سؤیله‌ییر بو آخشام اللر.
اؤز دوغما ایستی‌سی، حرارتیله
دیللنن بارماقلار،
دانیشان اللر.
گؤزلردن سۆزولور
بیر ائله نور کی،
دینیر اود اۆرکدن آلیشان اللر.
بعضاً ائله سوسور،
ائله سوسور کی،
کوبود بیر اوووجا سؽخیشان اللر.
تیتره‌ییر شام کیمی
ایشیق ساچدیقجا،
گؤزلین اؤزونه یاراشان اللر،
پریشان تئللری سؽغاللادیقجا
اؤزو ده کدرلی،
پریشان اللر.
قو تک یومشاقمیدیر،
سۆد تک آغمیدیر؟
کۆسوشن بارماقلار، باریشان اللر.
منه اؤز سیرّینی آچاجاقمیدیر
دانیشان بارماقلار،
دانیشان اللر؟
۵ یانوار ۱۹۹۸