مرحوم عؤمور یولداشیم گۆلاره اۆچون
سن گئتدین جاهانین
دردلی چاغیندا.
بیر چایا دؤندوم کی، سؽسقا آخیرام.
...سنسیز بیر اوتاغین تنهالیغیندا
شکلینه باخیرام...
یئنه باخیرام.
اسیر پنجرهدن
یئل اینجه-اینجه،
سانکی ایستی نفس اۆزومه دییر.
— گئجهن خئیره قالسین — سؤیلرم گئجه،
سحر ده سؤیلرم: صاباحین خئییر!
اۆرگیم ناراحات،
قولاغیم سسده
دؤورون حاقسیزلیغی تیتردیر منی.
چئوریلیب ملگه باشیمین اۆستده،
روحون گئجه-گۆندوز حیفظ ائدیر منی.
آخی، سنینلهدیر هر آنیم منیم،
سن منیم نیسگیلیم، پریشانیمسان.
گۆندوز شکیللرده سوسانیم منیم،
گئجه یوخولاردا دانیشانیمسان،
— آی نبی، اؤزوندن موغایات اول سن،
بیل، داها دۆننکی جاوان دئییلسن.
— البته، من سنی ایتیرن گۆندن،
حیاتیم دییشدی تامام کؤکوندن.
قار اسکیک اولماییر دوغما داغیمدان
بیر گۆنده آسیلیب هر آیاغیمدان.
بعضاً یئرسیز دۆشدوک هایا، هارایا،
آخی پیس ده گئدیر، یاخشی دا قالمیر.
سن منی قؽسقاندین بۆتون دۆنیایا،
ایندی دۆنیا منی هئچ سایا سالمیر.
تانریم باغیشلاسین،
گۆناه وارسا دا،
گۆناه خوشبختلیکدن پای آلان دئییل.
— گنجلیک گۆناهلاری یویولارسا دا،
قوجالیق گۆناهی یویولان دئییل!
گئج دویدوم حیاتین
من سیرلرینی،
زامان پریشاندیر، عؤمور پریشان.
من اؤز گۆناهیمین زنجیرلرینی
چوخدان پارچالاییب، چوخدان قؽرمیشام.
سنی یانا-یانا سسلهییرم کی،
ائشیتسین سؤزومو سئودیگیم ملک.
دۆنیادا او گۆنو گؤزلهییرم کی،
گۆلاره آدیندا نوهم گلهجک.
شکلینه باخیرام،
باخیرام یئنه،
سانیرام چینیمه یومشاق ال دییر.
— گئجهن خئیره قالسین — دئییرم سنه
سحر دئیهجگم:
— صاباحین خئییر!
8 آپرئل ۱۹۹۵