بیر سئوگی گمیسی ساحیله چاتدی
بیر سئوگی گمیسی ساحیله چاتدی،
گؤیدن بولود ائندی، یئر کؤلگهلندی.
...هدیّه وئرمیشدیم، گئری قاییتدی،
باشیما دۆنیانین اودو الندی.
نه اۆچون، قاییتدی گؤرن هدیّه؟
زامان دؤزوملودور، اینسان صبیرسیز.
دئدیم کدریمی ال آچیب گؤیه:
ارماغان اۆرگی بس نئیلهیک بیز؟
بیر سحر سئوگینین مئهی اسنده
اۆرگیم چؽرپیندی ملک کؤکسونده.
دئمیرم اۆرگی قایتارسین گئری،
مندهدیر بیر عؤمرون دؤیونتولری.
بیر دۆنیا دردی ده،
داشیییرام من،
سؤیود دئییلم کی، اسم، اییلم.
ایندی اۆرکسیز ده یاشایارام من،
بیر داها هئچ کسی سئون دئییلم.
طالع غضب ایله
دیللهنهجکدیر،
کۆلکله نه گلسه، گئدر کۆلکله.
اۆرک اۆرکسیزه داها گرکدیر،
بلکه خوشبخت اولا بخشیش اۆرکله
دؤنر کاروان-کاروان
آندلار، وعدهلر،
دؤنر داغ دا بیلمز، قایا دا بیلمز،
یئتیم خاطیرهلر
قاییدیب گلر،
تاپدانمیش محبّت قاییدا بیلمز.
18-29 اوکتیابر ۱۹۹۴