بیردن سؤندو ایشیقلار،
یئر باتدی قارانلیغا،
دنیزدن ماوی زولاق
دۆشدو ظۆلمت اوتاغا.
بلکه پوزماییم، — دئیه،
دۆنیانین آهنگینی.
عۆمّانلار گئجهلر ده
ساخلاییر اؤز رنگینی.
قارانلیغا سۆزولن
اینجه، الهی نوردو،
هردن قارا گؤزلره
پارلاق دالغا قونوردو.
گؤز قؽرپاندا ائله بیل
چاخیردی آنی شیمشک،
ظریف بیر سس دینیردی، —
او خیالدی، یا گئرچک؟
بیر گؤزلله اۆزبهاۆز
صؤحبت گئدیر صمیمی،
آرامیزدا قارانلیق
کئچیلمز یارغان کیمی.
بعضاً قؽریق میصراعلار،
ایسیدیر قلبیمیزی.
سؤزلر قوووشورسا دا،
ظۆلمت آییریر بیزی.
ساعاتلار اوزانیردی...
باییردا کۆلک، یاغیش...
قارانلیغین صؤحبتی
نه ایشیقلی اولارمیش!
گلدیمی مهریبانلیق،
بلکه گئدیر قارانلیق؟
ظۆلمت بیردن چکیلدی،
کیبریت چؤپو مشعلدی.
بیز ایدیک ایشیق وئرن
گؤیه، تورپاغا ایندی.
حاضیردیق یئر اۆزونه
شفق ساچماغا ایندی.
..ائنیردیک پیللهلردن.
اهمال-اهمال، آراملا،
بیر ال توتوب الیمدن
باکیره احتیراملا.
بو منه دایاق اولان
اۆرکدیمی، الدیمی؟
گؤیدن ائنیب گلدیمی؟
حسرتدی حرارته
آخی هاچاندی اۆرک،
یاخشی کی، سؤندو ایشیق،
یاخشی کی، یاندی اۆرک.
17-20 دئکابر ۱۹۹۲