بو گۆن زامان ترزیسی اییلمیشدیر
بو گۆن زامان ترزیسی،
اولوب یالان ترزیسی.
ریا، بؤهتان نه آغیرمیش یئر اۆزونده
ترزینین بیر گؤزونده حقیقتسه،
آغ یالاندیر بیر گؤزونده.
آزادلیغی بوغان الدن
سؽزان قاندیر بیر گؤزونده.
قؽزیل قانلار نئجه آغیر گلیر بو گۆن
بونا زامان ترزیسی نئجه دؤزسون.؟
کیشی دؤنوب آرواد اولور،
آرواد کیشی اولور بو گۆن.
دیشی دؤنوب ائرکک اولور،
ائرکک دیشی اولور بو گۆن.
سوسور سئوگی پیچیلتیسی،
جوشور شهوت هایقیرتیسی،
عرشه چاتیر پالانلارین
"سئکس" آدلانان لاققیرتیسی
اۆمیدلر ده، آرزولار دا گۆل آچمامیش
سولور بو گۆن.
واختی ایله ان قیمتلی
ضیالیلار، کیتابلاردی.
ایندی ایسه ان قیمتلی
دوللار ایله حسابلاردیر.
گؤردوگوموز مشدی عیباد
بو گۆن اوجاق باشیندادیر.
او سئچدیگی گؤزللر ده
ایستهدیگی یاشیندادیر.
شخصیتین بؤیوکلوگو پول ایله اؤلچولور
بو گۆن.
بونا زامان ترزیسی نئجه دؤزسون؟
ترزینین بیر گؤزونه،
اینسانلارین اینسانلارا
کین-نیفرتی قویولموشدور.
ترزینین بیر گؤزونه
میلّتلرین میلّتلره
عداوتی قویولموشدور.
میلّت تاراج اولان واختی
ثروتی ده حرّاج اولور،
قودورغانلار توخ گزرکن
عذاب چکن ائل آج اولور.
قهرمانلیق، مهریبانلیق
یوللاریندا زیل قارانلیق،
سئوینج وارسا، بیر داملادیر،
کدر-غمسه بیر عۆمّانلیق.
هر منزیله آیاق آچیر
شهیدلرین سوراقلاری،
ائرکن سؤنور مین-مین ائوین چؽراقلاری،
سولور کؤرپه یاناقلاری،
کؤرپه دردی چوخ آغیردیر،
یئری، گؤیو چوخ آغریدیر.
الیقانلی جلّادلارسا تورپاقلاری
پارچا-پارچا بؤلور بو گۆن،
بونا زامان ترزیسی نئجه دؤزسون؟
سن ای عصرین توفانیندا
یاتان ویجدان، اویان بو گۆن!
مۆصیبتلر، مشقّتلر
ائدیر یامان طۆغیان بو گۆن!
یاتان ویجدان،
اویان ویجدان!
سن اینسانلیق کئشیگینده دایان، ویجدان.
بلکه اوندا آنا تاریخ
حقیقتدن صؤحبت آچدی،
بلکه زامان ترزیسی
ائله اوندا طارازلاشدی...
بو اولاجاق،
گؤرن هاچاق؟
28 یانوار ۱۹۹۵