قارا گؤز یاشلاری

نه تئز ویداع دئدیک بیز علی‌اکبره،
دؤرد ایل ائله بیل کی، بیر آنلیق شیمشک،
رسّاما یالواردیم، قارا مرمره
اوغلومون شکلینی تبسّوملو چک.
ائله بیل مرمرده آغ چیچک آچدی،
سانکی ایشیقلاندی قاپقارا مرمر.
تبسّومو یئره، گؤیه یاراشدی،
آناسی یانینا کؤچنه قدر.
یوللار سۆکونتین گئتدی قوینونا،
گۆنشین شفقی قؽیقاجی دۆشدو.
آناسی اوزاندی اوغول یانینا،
بیر گؤر حسرتلیلر، هاردا گؤروشدو.
قبیر داشلاریندان یئر کؤلگه‌لندی،
تبسّوم یوخ ایدی اۆزونده اونون.
اوغول گؤزلرینده یاش گیله‌لندی،
قارا گؤز یاشی‌یدی گؤزونده اونون.
دۆنیانین بئله بیر سیرّی ده وارمیش،
تورپاق آلتیندا دا اینسان آغلارمیش.
یاشلار ایشیق ساچیر، نورلو سحرده،
آیین شفقینده پارلاییر گئجه.
ایکی قارا بۆللور دوروب گؤزلرده،
تیترشیر، دۆشه‌جک سانکی ایندیجه.
حیاتدیر! گۆنلری آیلار اودوردو،
یاشلار تیترک-تیترک ائله دوروردو.
بوردا اۆرک سوسور، نئجه دانیشیم،
ای منیم دؤرد یاشلیم، گؤزلری یاشلیم!
نه درددی باشیما جاهاندا گلدی.
یئنه طۆغیان ائدیر عؤمرون قؽشلاری،
نیه یئرین-گؤیون اۆرگی سویوق؟
آنان یانیندادیر، سن راحت اویو،
بلکه تئزلیک ایله آتان دا گلدی.
تؤک قارا تورپاغا قارا یاشلاری!

28 نویابر ۱۹۸۹