دردسیز آدام آختارمایین

تانری،
   درد چکمه‌یه
       صبر، دؤزوم وئر،
حیاتین یوللاری قؽشدیر، بوراندیر.
دردلیلر دۆنیادا یاریم پئیغمبر،
دردسیزلر دۆنیادا یاریم اینساندیر.
ذکا مسکنیدیر کیچیک چادیر دا،
فیکیرلر ظۆلمتده گۆنشدیر، آیدیر،
درد آنجاق اؤلدورمور، درد اوجالدیر دا،
مۆدریکلیک اولمازدی درد اولماسایدی.
یئکنسک بیر عؤمرون معناسی وارمی؟
سن ای راحت
   حیات،
       یولومدان چکیل!
ابدی خوشباختلار دردی دویارمی؟
ابدی خوشباختلیق بدبختلیک دئییل؟
دئییم کدریمین قطعیّتیله،
دردسیزلرین دردی داها بؤیوکدور.
اونلار کی، اؤز یۆنگول خاصیّتیله،
بۆتون یئر اۆزونه آغیر بیر یۆکدور.
تانری،
   درد چکمه‌یه
       صبر، دؤزوم وئر،
حیاتین یوللاری قؽشدیر، بوراندیر.
دردلیلر دۆنیادا یاریم پئیغمبر،
دردسیزلر دۆنیادا یاریم اینساندیر.

12 نویابر ۱۹۸۹