عئینک

چارپایی یانیندا، کیتابلار اۆستده،
گؤزلری گؤزله‌ین بیر عئینک دورور.
قاناد تک آچیلان، بۆللور شۆشه‌ده،
قورویوب گؤز یاشی، بیر خال تک دورور.
دولودور یئر اۆزو غمله، تلاشلا،
هله دئییلمه‌میش سؤزوم، آهیم وار،
او گئتدی دۆنیادان بیر داملا یاشلا،
بیر عۆمّان یاش تؤکدو دوستلار، قوهوملار.
گۆنلرین گل، حزین نئیی‌نی دینله،
سؤزده دردیمیزه نه چوخدور شریک.
باخیریق دۆنیایا سنین قلبینله،
دۆنیایا گؤزونله باخا بیلمیریک.
دردلر جله اییر قدّیمی هردن،
سانکی داغ زیروه‌سی اوچور اۆستومه.
عئینکدن،
   گۆزگودن،
       پنجره‌لردن
گؤزلر ملول-ملول باخیر گؤزومه.
اوسا اوزاقلاردا بیر ملک کیمی،
زرلی کوجاوه‌نی یئل تکی سۆرور.
سما نهنگ، بۆللور بیر عئینک کیمی —
بیز اونو گؤرموروک، او بیزی گؤرور.

6 نویابر ۱۹۸۹