کۆلک

یئنه پاییز گلدی قوناقلار کیمی،
سولدو محبّتیم یارپاقلار کیمی،
اۆرک پؽچیلداییر دوداقلار کیمی،
کۆلک، نیه بئله اسیرسن، کۆلک؟
نیه اۆمیدیمی کسیرسن کۆلک؟

سئوگیلیم گؤروشه چاغیرمیش منی،
من نئجه اونودوم اولوب-کئچنی؟
او دئییر آستاجا: "سئومیرم سنی..."
سن نیه سؤزونو کسیرسن، کۆلک؟
کۆلک، نیه بئله اسیرسن، کۆلک؟

او اۆرک آغریتدی، اۆرک اینجیتدی،
بیر عشقین سئویملی نغمه‌سی بیتدی.
سانکی محبّتیم خیالدی، گئتدی...
کۆلک، نیه بئله اسیرسن، کۆلک؟
سنده‌می سئوگیمی گزیرسن، کۆلک؟

۱۹۵۹